Shillong, Nailur 10
Ka MLA jong ka Sutnga-Saipung ka Kong Santa Mary Shylla ha ka sngi Palei ka la ong ba ka Sorkar Pdeng kala ai ïa ka jubab kaba sngewtynnad ïa ka jingïakhun ka Sorkar Meghalaya halor ka kam tih dewïong da ka jingstad saian bad ka kynhun na Delhi ka lah ban wan sha Jylla ha u bnai Risaw ban khmih da la ki jong ki khmat la ka long ne em ban tih par da ka jingstad saian.
Ka Kong Santa Mary ka ïathuh ba ka Ministry of Mines ka Sorkar India kala pynlong ïa ka jingïalang ha Delhi bala pynïaid da u Additional Secretary ka tnad Rupinder Brar, kaba la ïashimbynta lang da ki ophis ka Directorate of Mineral Resources ka Sorkar Meghalaya, u Secretary ka tnad Ain Bah CVD Diengdoh bad ki nongmihkhmat ka CMPDIL.
“Ka jingïalang ka long kaba sngewtynnad bha. Ki ophisar jong ngi kila buddien halor ka kam tih dewïong da ka jingstad saian ha Meghalaya. Ngi la ai ka jingbatai bad ka CMPDIL ruh kala batai ïa kaei kaba lah ban leh, khamtam ha East Jaiñtia Hills. Kila pyni ïa ka jingsngewbha bad ki lah ban wan sha Meghalaya ban peit kumno ka rukom tih par ka ïaid ha ki par,” ong ka Kong Santa Mary haba ïakren bad ki nongthoh khubor.
Ka ïathuh ba kane ka jingïalang ka dei kaba pynbud ïa ka dorkhas bala aiti dang shen da ma ka lem bad u Myntri Rangbah Conrad K Sangma sha ka Sorkar Pdeng.
“Ha ka dorkhas, ngi la kdew ïa bun tylli ki mat, hynrei ka jingkyrpad ba hakhmat eh ka long ban pynduna ïa ka jaka ba donkam ban tih par da ka jingstad saian. Ka Open-cast kam ïahap satia ha Meghalaya namar ka bun ka jinglut bad kan lam sha ka jingjulor ka mariang. Nalor kata, ka jinglong trai jaka hangne hi ka dei ki riew shimet, kumta dei ban pyrkhat ïa ka jingai licence sha ki riew shimet,” ka la ong.
Haba pynpaw ba ki paidbah jong ka Jylla, khamtam ha ki thaiñ ba don ki par dewïong, kila mad ïa ka jingeh ha ka pisa pilain namar ka jingkhang tih dewïong, ka Kong Santa ka ong ba ka Sorkar kala trei shitom ban pynsdang biang ïa ka jingtih dewïong ba la teh da ki kyndon.
“Naduh u 2019, kane ka dei ka sien ba nyngkong ba ka Sorkar India kala pyni dak ba sngewtynnad. U Myntri Rangbah u la trei khlem thait miet la bad sngi na ka bynta ki paidbah bad ïai kyntur shakhmat ïa kane ka kam, bad ngi la kyrshan ïa u ha baroh ki sienjam,” kala ong haba bynrap ba ka Ministry kam pat buh satia ïa ka tarik hynrei ki lah ban wan ha u bnai Risaw.
