Shillong, Nailur 10
U Bah Ardent Miller Basaïawmoit, President ka Voice of the People Party (VPP), uba dei ruh u MLA na Nongkrem Konstitwensi, u la ong ba u la dep kren halor ka bynta jingpyntreikam ka Sorkar Jylla ïa ka Structured Pay Framework ha Ïingdorbar Thawaiñ ka Jylla na ka bynta ki nonghikai Deficit.
Haba kren sha ki lad pathai khubor u Bah Ardent u la ong, ba kane ka SPF ka buh jingeh ïa kiba aplai kam hikai Deficit ha ki por ban wan bad namar ka jingsiew kam dei shuh ka Deficit Scale.
U la ong ba ka Sorkar ka khñiot beiñ ïa ki khun samla hapdeng ka jingkyrduh kam jingkyrduh jam bad bynrap ba bun ki khun samla ki phet leit trei shabar jylla watla ka jingsiew ka long tang 10 haduh 15 hajar shi bnai.
“Ka long ka jinglehraiñ ba kiwei kin ong ba kumno tang i kam ba 10 hajar tyngka ka Sorkar Meghalaya kam lah ban thaw na ka bynta ki samla haduh ba ki leit trei shabar jylla nalor ki jingeh kiba bun,” u la ong.
“Kum ka party ngi sngewkhia halor kane ka mat. Ka jingthrang jong ka VPP ka long ba ngi hap ban khring ïa ka briew ba don sap ha ka kam hikai, hynrei lada ka long ha kane ka rukom, kumno ngin lah ban khring ïa ka riew donsap ha ka kam hikai. Ngin ïai kren, ngin ïai ksaid, ngin ïai ïaleh na ka bynta ki nonghikai,” la ong u Bah Ardent.
