Nongstoiñ, Nailur 10
Ha ka sngi Palei jong ka taiew ka skul Sibsingh Memorial Government Higher Secondary, Nongstoiñ, kala plie pyrda ïa ka jingrakhe dap 50 snem jong ka jingïaid lynti ka skul ha ka jingïalang kaba iphuh iphieng kaba la ïoh ban pynlong hapoh ka phyllaw jong ka skul hapoh ka shnong Mawkhlam-Nongpyndeng ha kaba u MLA ka Nongstoiñ Bah Gabriel Wahlang u la long u kongsan.
Haba kren kum u kongsan, u Bah Gabriel Wahlang u la ong, katkum ka jingpeit ha ki snem, kane ka jingrakhe dap 50 snem ka dei tang jong ka Higher Secondary hynrei lada peit ïa ka jingïaid lynti jong ka skul naduh ba sdang kala kot da ki bun phew tylli ki snem.
U Bah Gabriel u la ong ruh ba ki khynnah skul bad ki nonghikai ki lah ban leit bad ban wan hynrei kane ka skul ka neh ban ai jinghikai bad ban nang kyntiew ïa ka pule puthi jong ki khynnah na ka por sha ka por.
Shuh shuh u la pynkynmaw ruh ïa ka jingpaw ka skul ha kiba bun ki bynta kata naduh ki snem 1984 la ka long ha ka sports ne ha ka jingnang jingstad.
Ha kane ka jingrakhe dap 50 snem, nalor u MLA la donlang ruh ka Hema Nayak, DC ka WKHD bad u Paiem EP Syiem, Syiem ka Hima Nongstoiñ kum ki symbud kongsan, kiba la ïoh ruh ban pynher ïa ka lama jong ka skul ban tbeh ruh ïa ka sharak bad ban ot ïa u cake kaba long kum ka dak jong ka jingplie ïa ka jingrakhe dap 50 snem jong ka skul.
Nangta, la donlang ruh ka Kong Y Nongkynrih, Principal jong ka skul, Kong C Kharbhih DSEO, WKHD, ki ophisar Sorkar, ki riew rangbah jong ka shnong, ki khynnah skul barim ki kmie ki kpa ki nonghikai bad kiwei-kiwei kiba la shah khot sngewbha.
