Shillong, Nailur 10
U Myntri Rangbah ka Jylla Conrad K Sangma ha ka sngi Palei, u la kular ban weng ïa ki jingeh jong u paidbah da kaba buh ïa ka por ban pyndep haba ïashimbynta ha ka jingïalang CM-Connect ha Rongara, South Garo Hills.
Ka CM-Connect ka dei ka prokram kaba ai ka rynsan ïa ki nongshong shnong ba kin pynsngew beit beit ïa ki jingeh jong ki hakhmat u Myntri Rangbah ka Jylla.
U Myntri Rangbah u la bthah ïa ki ophisar jong ki tnad bapher-bapher ba kin shim jingthoh ïa man ki jingeh bala pynsngew da u paidbah bad bthah ba kin leh eiei noh mardor kham kloi kat kaba lah.
Ki nongshong shnong ka Rongara kila pynsngew ïa ka jingsngewkhia halor ka jingbym ïoh um thikna ha Lower Nekora, pan ïa ka centre ban pynlong ïa ki Board exam bad ki sienjam ban tehlakam ïa ka jingshlei um ha Ïew Lower Nekora kaba don marjan ka madan ïalehkai.
La pynsngew ruh ïa ka jingsniew ka surok Ampanggre-Wasogittim ha kaba u Myntri Rangbah u la bthah ïa ki ophisar ka tnad PWD ba kin leit shim jingkhein wut wut ïa ka bynta ba nyngkong jong ka jingkieng bad ban maramot noh ïa ka surok. U la bthah ïa ki ba kin sdang noh ïa ka kam khlem ka jingpynslem shuh.
U Myntri Rangbah u la kubur ba man ki jingeh kim dei kiba lah ban pynbeit mardor. Hynrei, u la kular ïa ki nongshong shnong ba ka Sorkar kan sa shong bishar ïa man kawei pa kawei ka jingdawa.
“Watla ngan sa ai ka jingbthah ïa ki kam kiba lah ban pynbeit noh mardor, kin don ruh kiwei ki kam kiba hap ban shong bishar bad sa leh ïa kaba donkam,” u la ong.
U Conrad u la ong, “Ka CM-Connect kala pynlah ïa nga ban sngewthuh ïa ki jingeh ba la mad da ki shnong ba sha kyndong eh jong ka South Garo Hills, bad ngan pyntikna ba ki shnong kin ïoh ïa ka umbam ha man ki thliew ïing”.
Kiwei pat ki jingdawa ki kynthup ïa ka jingpynbha bad maramot ïa ka bungalow ha Moheshkola, ban kyntiew kyrdan ïa ka Jujolgre LP School, kaba la don ïa ka tnum kaba pei um bad ka kynroh kaba la khyllem.
Shuwa kane ka jingïakren, u Conrad u la sam ruh ïa ki tiar Maternal and Child Care sha ki nongïoh bynta. Kane ka dei ka prokram kaba la sdang pyntreikam na Siju-Rangara bad hadien yn sa pyntreikam ha baroh kawei ka Jylla.
