Shillong, Nailur 10
Ka Kong Ampareen Lyngdoh kaba dei ka MLA ka East Shillong Constituency kaba dei ruh ka Myntri barim ha ka Sorkar Jylla ka la pynpaw ba kam ju kynthih kulmar na kawei ka seng saiñpyrthei sha kawei pat khlem da pan jingmut na ki nongkyrshan ne ki nongshong shnong ka Constituency kaba ju mihkhmat.
Kane ka jingïakren bad ka Kong Ampareen Lyngdoh ka dei hadien ba la mih ka khubor hamsaia ba ka lah ban leit pynïasohlang sha ka BJP kumba la leh da kiwei ki MLA.
Ka Kong Ampareen ka la ong ba kam sngewtynnad ïa kito ki briew kiba pynthohbria ban phet na kawei ka seng sha kawei pat khlem da ïaleh ïa ka ilekshon.
“Ngam ju mlien ban phet seng khlem da ïakhun ilekshon namar nga dei ka MLA kaba bunkam bad ngam kwah than ban tuklar ïa kiwei bad ngam sngewtynnad ban ïakhana bad kiwei” ka la ong.
Ka la ong ba ïa kine ki briew kiba pynthohbria dei ban ïalam sha ïingbishar ban pynshisha namar kam ïahap ban ïalam bakla ïa ki paidbah namar kane ka jingpynmih khubor thok ka long kumba dang ai ding shuh-shuh haba ka saiñpyrthei ka shong synjor.
Haba kylli, la ki don ne em ki MLA ka NPP kiba kwah ban bujli noh ïa u nongïalam, ka Kong Ampareen ka la ong ba kam don kum kata namar baroh ki dang shaniah ïa u Conrad K. Sangma kum u nongïalam.
“Nga sngewnguh ïa ka seng NPP kaba la leh bha ban trei ïa ka bha ka miat hapoh ka Jylla, kumta kum ka nongïalam ngi hap ban don ka jingkitkhlieh ban pynskhem ïa ka synshar khadar” ka la ong.
Ka la ong ruh haba ki paidbah ki la ai ïa ka bok ha kine ki san snem, ym dei ban leh kamkai ban phet sharum shaneng namar ka sngewking baïong ka khlieh hynrei dei ban trei shitom ban pynkhreh ïa ka ilekshon ka ban sa wan.
Ha kine ki sngi ki don ki khubor hamsaia ba ki don ruh ki MLA na ka NPP ban phet noh ban leit sha ka BJP kumba pynkhreh phet ki MLA ka UDP sha ka BJP na bynta ban thaw ïa ka Sorkar kaba thymmai.
Ka NPP kaba la ïalam da u Conrad K Sangma kum u Myntri Rangbah ka Jylla ka don ïa ki MLA haduh 33 ngut ba la synrop ïa ka Sorkar kaba kynthup ïa ka UDP kaba don 12 ngut, ka HSPDP ka don 2 ngut, ka BJP ka don 2 ngut bad ar ngut ki MLA shimet.
