Shillong, Nailur 10
Ha ka jingpynkylla ha ka kam thungkam thungjam, ka Sorkar Jylla kala pynduh noh ïa ka jingshim personal interview na ka bynta ka kam Group C non-technical.
Ka office memorandum bala pynmih da ka tnad Personnel and Administrative Reforms (B) ha ka sngi Palei ka ong ba u Lat u sngewbha ban hukum ïa ka jingpynsangeh noh ïa ki interview ban thung kam beit beit ha ka Group C non-technical kiba hap hapoh ka pay level 2 haduh level 10.
Ka hukum kan treikam noh naduh ka 1 tarik Kyllalyngkot, 2027 bad kan treikam ïa ki kam bala pynbna lait kam ha lane hadien katei ka sngi.
Kane ka sienjam ka long kum ka jingpynbteng ïa ka memorandum ka tnad ba 29 tarik Naitung 2025, kaba la pynduh noh ïa ka interview ïa ki kam Group D naduh ka 1 tarik Risaw, 2025 kaba ïaid ruh katkum ki jingpynkylla bala wanrah da ka Sorkar Pdeng ha u 2015.
U Commissioner and Secretary Bah CVD Diengdoh, ha ka memorandum, u la bthah ïa baroh ki tnad bad ki bor thungkam kynthup ka MPSC, District Selection Committee bad kiwei ki Board thungkam ba kin pyntreikam pyrkhing bha ïa kane ka hukum bad ban pynkylla ïa ki rule thungkam lada dang kdew ïa ka jingshim interview kum shibynta jong ka jingthungkam.
Ka Sorkar kala pynshai ba ki qualifying test kum ka skill test, typing test bad physical efficiency test kin dang ïai bteng.
Lada don ka jingïoh mar katjuh ïa ki mark ha ka written exam, ki kyrtong kiba ïoh bun ka aggregate marks ha ka klas 12 kin ïoh shuwa, bud da ka marks klas 10 bad ka jingheh rta lada dang ïa long mar katjuh.
Kane ka hukum kan ym treikam ha ka jingthungkam pulit bala pynlong da ka Central Recruitment Board bad kiba thungkam contract lane nongbylla sngi.
Ka Sorkar kan sa thung ruh ïa ka committee ka ban shong bishar ha ka jingthungkam ha ka kam technical bad non-technical hapoh ka Group C.
