Shillong, Nailur 10
Haba kyntait ïa ka khubor ban kynthih sha ka BJP, u MLA ka TMC Mizanur Rahman Kazi ha ka sngi Palei u la ong ba ki MLA ka TMC ki long tylli kawei bad kam shym la don satia kano-kano ka rai ban leit pynïasoh sha kiwei pat ki seng saiñpyrthei.
Kumba ka long mynta, ki khubor ki la her bad saphriang ba ki don haduh saw ngut ki MLA ka TMC bad khyndai ngut napdeng ki 12 ngut ki MLA ka UDP kiba dang pynkhreh ban pynïasoh sha ka BJP.
Haba kynthoh halor kane, u Kazi u la ong, “Ki la don bun ki khubor bad ki jingthoh ha ki rynsan social media, kiba bun ki pynmih tang kumno ban kamai spah. Kumba ka long na ka liang jong ka TMC, ngim pat shim satia kano-kano ka rai. U nongïalam jong ngi um pat shym la khot ïa kano-kano ka jingïalang ban ïakren halor kane ka mat. Kumba ka long mynta, ngi long tylli kawei bad ka seng. Ngim tip aiu kan jia pat ha ka por ban wan, hynrei kumba ka long mynta, kam don satia eiei kaba kum kata.”
Haba kylli hato ki la don ne em kiba wan ïakren na ka BJP, u la ong ba ka jingïakren ne ki nongwan ïakren ki ju don beit ha ka saiñpyrthei.
