Shillong Nailur 11
U myntri ka tnad pule puthi u bah Lahkmen Rymbui mynta ka sngi Thohdieng u la ther tyngeh ïa ka liang pyrshah ka Voice of the People Party halor ka jingdawa ban weng noh ïa u Commissioner & Secretary ba dei peit ia ka tnad pule puthi u Vijay Kumar Mantri da kaba khot ïa u kum u ophisar uba trei shitom tam bad uba lah ban ioh ia ka tnad.
“Nga la ïohi ïa ki daw ba la kdew da ki seng saiñ pyrthei. U Vijay Mantri u dei haduh mynta u ophisar uba trei shitom tam bad uba lah ban ïakynduh ïa kino kino ki briew ne ki kynhun,” la ong u Bah Rymbui.
U la ong ba u Mantri un ym lah ban pynbeit mardor ïa man la ka mat hynrei u dei u briew uba shah skhor.
“U shah skhor bha bad u don ka jinglah ban sngewthuh bad pynbeit ïa ki jingeh,” la ong u Rymbui.
“Haba ki nonghikai ki dang shah thngan ha Malki, u la leit arsien kum u nongmihkhmat jong ka sorkar ban ïathuh ïa ki ba ngi wanrah ïa ka rukom siew tulop kaba thymmai. Ka jingdawa ka long ban pynkiew ïa ka tulop bad ban wanrah ïa ka jingshngiañ ha ka kam ki nonghikai. Hapoh u Myntri Rangbah ka Jylla Conrad K Sangma, ngi la trei halor kane. U la ïakynduh ïa ki seng bapher bapher kaba la ïalam sha ka rukom siew tulop kaba thymmai,” ong u Rymbui.
“Kum u khlieh jong ka tnad, u la pyrshang katba lah bad pynsngewthuh ïa ka sorkar ban shim ïa ka sienjam kaba tyngeh,” u la ong.
U Rymbui u la ong ba ka rukom treikam kaba thymmai ka wanrah ïa ka jingshngain bad ka jingithuh.
“Mynshuwa ha ka adhoc, uwei uba trei la 30 snem bad uwei uba dang shu rung ki don ha kajuh ka kyrdan. Mynta ngi don ïa ka saiñdur ha kaba ka don ka jingshngain bad ka jingithuh,” u la ong.
U la kdew ia ka jingai khublei jong ki nonghikai ia u Myntri Rangbah ka jylla ha Shillong, Tura bad Williamnagar kum ka jingpynshisha ba ka sorkar ka pynbeit ïa ki jingeh.
Haba shim ia ka jingkynthoh ka VPP, u Rymbui u la ong, “Lada don mano mano ba lah ban pynithuh ïa u ophisar uba kham tbit ban ïa u Vijay Mantri, sngewbha ban ïathuh. Kam don jingeh. Ngi don arngut ki Commissioner & Secretary bad ki treikam bha. To ngin ym pynduh mynsiem ïa ki ophisar kiba pyrshang ban trei na ka bynta ka system.”
“Baroh kim long kiba janai, ngam long uba janai, hynrei ngi pyrshang ban pyndep ïa ka jingkitkhlieh jong ngi,” u la bynrap
