Shillong, Nailur 11
Ki pulit ka Crime Branch Police Station, Shillong, ha ka 11 tarik Nailur, 2026, ki la khot hajir ïa san ngut ki nongshong shnong ka Shnongrim, Elaka Nongkhlieh, East Jaiñtia Hills District, ban ai jubab halor ka ejahar kaba ki la dep ban ujor myn ha ka 08 tarik Nailur 2026, kata pyrshah ïa u SP bad DC ka East Jaiñtia Hill, ïa ki ophisar ka MSPCB, lem bad kiwei-kiwei pat, hadien ka jingmih ka kynrum kynram ha ka por ba pynlong ïa ka Public Hearing ka Shree Cement.
Haba kren sha ki lad pathai khubor hadien ka jingwan hajir, kawei na ki nongshong shnong, ka Kong H Sukhlain, ka la pyntip ba na ka liang ki pulit ka Crime Branch, ki la buh shibun ki jingkylli haba ïadei bad ka jingujor jong ki.
Ka la ong ruh ba ki pulit ki la kylli halor ki briew kiba mynsaw na ka jingkulmar kaba mih namar ka Public Hearing, ba hato ki ïohi markhmat ne em halor katei ka jingjia.
Haba kylli, ka la ong “Ka jingslem jong ki ban ujor ïa ka ejahar, kadei namar ba kum ki nongshong ki khmih lynti ba ka Sorkar kan kem ïa ki briew kiba pynkulmar da kaba pynshong nongrim lyngba ki durkhih, kiba la saphriang kumba la kem ïa ki nongïalam ka Khasi Students’ Union (KSU).
Ka Kong H. Sukhlain ka la ong ruh ba ki nongshong shnong ki dangmut ba ka Sorkar kan kem noh mardor ïa ki briew kiba donkti ban tih ïa ka surok bad ba pynkulmar, hynrei kam shym la kem. Kumta ka la pynlong ïa ki nongshong shnong ban ujor noh da ka ejahar.
“Ngim lah shah ban shu sngap halade, namar ka jingjia mynha ka 19 tarik jong ka KSU, ka la jia shuwa ha ka Public Hearing, hynrei kim lah ban kem. Ïa ki nongïalam KSU ki la kem, hynrei ïa ki briew ba pynmih jingkulmar, kiba tih dusmon ïa ka surok, kiba pynmynsaw ïa ki paidbah kim shym la kem,” ka la bynrap.
