Shillong, Nailur 11
Ka long shisha ka jingkmen ïa ki bahaïing hasem namar mynta ka sngi ka 11 tarik Nailur ka Siba Shadap kaba dang shi snem shiteng kaba dei ka khunswet na ka shnong Madan Myn-ih West Karbi Anglong ka la mih noh na Diphu Medical College & Hospital (DMCH) hadien ba ka la pyndep ïa ka jingshah sumar.
Ka jingkoit jingkhiah jong ka Siba ka la wanrah ïa ka jingkmen ïa ka meiieid bad ki bahaïing hasem jong ka, kiba la ïaid lyngba ïa ka por kaba eh ha ka por ba kane ka heprit ka dang pang. Ka meiieid jong ka bad ki bahaïing hasem jong ka ki la pynpaw ïa ka jingsngewnguh kaba khraw ïa u MP ba don burom u Amarsing Tisso uba dei u dkhot jong ka Ïingdorbar na ka Diphu (ST) Parliamentary Constituency uba la ai ka jingkyrshan kaba sngewrit bad pynthikna ba une u khynnah rit un ïoh ïa ka jingsumar kaba biang.
Ka longïing ka la pynpaw ruh ïa ka jingsngewnguh kaba khraw ïa u Bah Pynshngainlang Rattane uba long u President ka United Khasi People’s Organisation (UKPO) bad u Chairman jong ka Education Board, Rongkhang Block, KAAC, na ka bynta ka jingshakri ba khlem len lade bad ka jingïarap ba khlem sangeh jong u ha baroh shilynter ka jingshah sumar jong ka Siba.
U Pynshngainlang Rattane u la ïai don bynta bha bad ka jingsumar ïa kane ka heprit bad u la kyrshan ïa ka longïing ha ki sngi kiba eh jong ki ha hospital. Ka jingdon bad jingïarap jong u ka la ai mynsiem kaba donkam bha ïa ka meiieid bad ka ïing ka sem jong ka Siba. Ka jingpyndep hok ïa ka jingsumar ïa ka Siba bad ka jingmih jong ka na hospital ka la kylla long ka nuksa kaba pynkmen ïa ka jingsngewrit, ka jinglong briew bad ka jingsumar lang.
Ki bahaïing ki la pynpaw ïa ka jingkyrmen ba mynta ka Siba kan sa lah ban wan phai noh sha la ïing bad ban bteng ïa ka jingkoit jingkhiah jong ka ha ka jaka kaba shngaiñ bad kaba don ka jingieit.
