Shillong, Nailur 11
U Bah Olan Suiñ uba dei u MLA ka UDP na Maw-synram Constituency u la ong lada ki jingdawa jong ki phra ngut ki MLA ïa ki mat ki jura na bynta ka jaidbynriew bad ka Jylla baroh kawei kin urlong, ka jingrung BJP kan sa urlong.
Kane ka jingpynpaw u Bah Suiñ ka dei haba ïakren bad ki nongthoh khubor hadien ba la wai ka Central Executive Committee ka UDP ha ophis treikam ha Shillong kaba long mynta ka sngi.
U Bah Suiñ u la pynkynmaw ba ha por ba u Bah JJM Nichols Roy u rung sha Congress ki paidbah ki pyrshah ha kito ki por hynrei u ong ïa ki paidbah ban ailad ïa u ban rung Congress ban wanrah jingmyntoi bad ynda u la rung u la pyn-ïoh da ka Khyrnit kaba hynriew ha ka riti synshar ka ri India ban ïada ïa ka khyndew ka shyiap bad ka riti dustur.
Kumta u la ong lada ki jingdawa jong ki phra ngut ki MLA ka UDP ka urlong kan sa jia shen ban rung BJP.
U la ong kine ki mat ba ki phra ngut ki MLA ka UDP ki buh hakhmat ki nongïalam ka BJP ki long ka ktien Khasi ban rung noh sha ka khyrnit kaba phra ka riti synshar ka ri India, ban pyllait noh ban tih dewïong, ban weng noh ïa ki briew kiba sah ha them metor.
U la ong ba ka ktien khasi kaba la dep mynjur ha ïingdorbar thawaiñ mynta ka sah ha kti jong ka Sorkar India bad lada ka Sorkar India ka la mynjur ïa kine ki jingdawa kam don jingeh ïa ki phra ngut ki MLA ban rung sha ka BJP.
U la ïathuh ba haduh mynta kim pat don ïa u nongïalam hynrei baroh phra ngut ki MLA ki dei ki nongïalam.
Kumban shu pynkynmaw ki khubor kiba mih ha kine ki sngi ki ïathuh ba ki don khyndai ngut ki MLA ka UDP kiba thmu ban rung sha ka BJP, kita long u Bah Paul Lyngdoh na West Shillong, Bah Lahkmen Rymbui na Amlarem, Bah Mayralborn Syiem na Nongpoh, Bah Synsharkupar Lyngdoh Thabah na Sohiong, Bah Kyrmen Shylla na Khliehriat, Bah Pius Marwein na Ranikor, Balajied Synrem na Shella, Bah Olan Suiñ na Mawsynram, Bah Matthew Beyonstar Kurbah na Mawphlang.
