Nongpoh, Nailur 11
Ha kawei ka jingjia tyngkhuh kali ha ka Sngi Thohdieng, ar tylli ki kali ba kynthup ïa kawei ka ‘Renault Duster’ kaba don ïa u nombor ML-05-AA-1799 bad ka Mahindra Bolero kaba don ïa u nombor ML-05-S-3352 ki la shah tynrah ha ka trok kit maw ‘Clinker’ kaba don ïa u nombor NL-01-AH-6742 ha ka surok Shillong By-pass kaba dang hap ha Umroi Madan.
Katkum ka jingïoh jingtip, la ïathuh ba katei ka trok kaba la ñiah da u Bah Samely Rymbai na ka shnong Moodymai, West Jaiñtia Hills District, ka dei kaba dang wan na Lumshnong bad thmu ban leit sha Sonapur, Assam.
La ïathuh ruh ba utei u nongñiah u dei uba la shoh khaw’iang bad mar ïa poi ha ki bynta marjan bad ka Tyndai Resort ha Umroi Madan, namar ka jingbym lah tehlakam shuh ïa ka kali, utei u nongñiah trok u la leit ban tynrah beit-beit ïa ki kali kiba la pynsangeh harud surok, kata nyngkong shuwa ïa ka ‘Renault Duster’ haduh ba kan da pra phom bad hadien pat sa ïa ka Mahindra Bolero, kaba la ngat ruh ha ka jingjulor.
Ha kane ka jingjia, u nongñiah jong ka ‘Renault Duster’ uba la tip kyrteng kum u Iamutlang Nongspung na Mawryngkneng, East Khasi Hills District u la ngat ha ka jingmynsaw bad la pynkit noh ïa u sha Bhoirymbong CHC na ka bynta ban ïoh jingsumar, katba ha ka Bolero pat ym shym la don briew satia ha ka por jong katei ka jingjia.
La ïoh jingtip ruh ba na ka liang ki pulit ka Khapmara PIC, ki la tan noh ïa baroh lai tylli kitei ki kali sha thanad na ka bynta ban leh bad pyndep ïa ki jingdonkam katkum ki kyndon jong ka aiñ.
