Shillong, Nailur 11
U Myntri Rangbah ka Jylla, u Conrad K. Sangma ha ka Sngi Thohdieng u la ong ba ka pule-puthi ka ïoh ïa ka mang tyngka kaba heh tam na ka Sorkar jong u, ha kaba palat T.3,500 klur la pynlut man u snem.
U Conrad u la kren ïa kane ha ka jingïalang plie ïa ka St. Joseph Sodality Zonal Convention kaba la long ha Don Bosco Higher Secondary School, Tikrikilla, ha kaba u la plie ruh ïa ka ïingskul ba la pynheh kumjuh ïa ka ‘Computer Lab’ kaba la pynthymmai.
Ha kane ka prokram la wan ban ïashim bynta da u Symbud Lamphang, u Limison Sangma, u Myntri ka tnad jngohkai pyrthei, u Timothy D. Shira bad u MLA, u Jimmy D. Sangma.
“Ka long ka jingsngewkmen kaba khraw ban don lang hapdeng ki khynnah pule bad ban long shi bynta jong kane ka jingïalang bah,” la ong u Conrad.
Haba ai khublei ïa ki bor pynïaid skul, Parish bad Diocese, u Conrad u la ong ba baroh ki jingkyrkhu ki wan na jrong bad kumta dei ban ainguh ïa U Blei na ka bynta ka jingaiei jong U.
“Ka Sorkar ka ju ngeit ba ka pule-puthi ka dei kawei na ki nongrim ba kongsan na ka bynta kano-kano ka imlang-sahlang. Da kaba pynshong nongrim ha kane ka jingngeit, ka jingmang pisa kaba heh tam ka dei na ka bynta ka pule-puthi. Ngi pynlut palat T.3,500 klur man u snem na ka bynta ka pule-puthi,” la ong u Conrad.
U la ong ba katba ka bynta kaba heh ka leit sha ka tulop, ka Sorkar ka la pyrshang tyngeh ruh ban pynbha ïa ki jingtei.
“Ha kine kiba bun snem ba la dep, ngi la bei tyngka ha ki ïingskul bad kiwei-kiwei ki jingdonkam, ban pynbha ïa ka jingkheiñ ha ka liang ki khynnah skul bad ki nonghikai bad ban kyntiew ïa ka jingdon jong kiba ‘pass’,” u la ong.
U Conrad u la ong ruh ba ka jingpynleit jingmut mynta kan long halor ka jingmanbha.
“Ka jingpynleit jingmut kam dei tang ha ka jingbun, hynrei ha ka jingpynbha ïa ka jinglong-jingman jong ka pule-puthi. Kane kan long ka jingthmu ba kongsan ha ki sngi ban wan,” u la ong.
Haba ai khublei ïa ki nonghikai halor ka jingtrei minot jong ki wat hapdeng kiba bun ki jingeh, u Conrad u la ong ïa ki khynnah skul ba kim dei ban shim sting ïa kine ki jingdonkam bathymmai.
“Hadien ba nga la leit kylleng ka Jylla bad ka ri, nga lah ban ong ba phi pule ha kawei na ki skul kaba kham bha ha ka ri baroh kawei. To kheiñ ïalade ba phi long kiba donbok, long kiba sngewnguh bad to aiti pura ïalade ha ka jingpule,” u la ong sha ki khynnah pule.
