Jowai, Nailur 11
Ka Jaiñtia National Council (JNC) ka la ther tyngeh ïa ka Sorkar Jylla halor ka projek tih mawshun jong ka Shree Cement ha Lum Syrman, Elaka Nongkhlieh, East Jaiñtia Hills, da kaba kynnoh ba ka jingthaw ïa ka ‘Fact-Finding Committee’ (FFC) ban tohkit halor ki jingjia ha ka sngi pynlong ‘Public Hearing’ ka dei tang ka buit ban pynthame bad ïalam bakla ïa ki nongrep bad ki trai jaka.
U President ka JNC, Bah Sambormi Lyngdoh u la ong ba watla ka Sorkar ka la pynbna ban pynsangeh ïa baroh ki kam jong ka Shree Cement bad ba ka jingtohkit jong ka komiti halor kitei ki jingjia kam thombor ki la sdang, hynrei ki jingtrei jong kane ka kompeni ban ïoh ïa ka ‘Environmental Clearance’ kam pat shym la sangeh satia.
Ha ka 8 tarik Nailur, ka ‘State Level Expert Appraisal Committee’ ha ka jingïalang kaba 103 hapoh ka mat ba 7, ka la pdiang ïa ka jingkyrpad jong ka Shree Cement ban ïoh ïa ka ‘Environmental Clearance’ (EC) ha Lum Syrman.
Lada ka ‘Public Hearing’ ka dei kaba don ki jingduna bad kaba pynmih ïa ka huri-hura, kumno yn lah ban bteng ban pynïaid ïa ka kam ban ïoh ïa ka EC, buh jingkylli u Bah Sambormi.
U la ong ruh kumba ka long mynta, kane ka komiti ka dang dei tang ka syrngiew.
“Haduh mynta kam pat don ka jingpynbna halor mano ban khlieh ïa ka komiti, mano ki dkhot, kiei ki kyndon lane ka por ba la buh ban aiti ïa ka kaiphod. Kane ka komiti ka dang dei tang ka syrngiew ngim lah ban shaniah ïa kane,” u la ong.
Une u nongïalam ka JNC u la ong ba ki paidbah ka Ri-lum Jaiñtia ki dei ban sngewthuh shai ïa ka jingthmu jong ka Sorkar.
“La thaw ïa kane ka komiti tang ban pynphai ïa ki jingmut jingpyrkhat bad ïalam bakla ïa ki trai jaka bad ki nongrep ha Lum Syrman. Lada ka Shree Cement ka ïoh ïa ka EC, ka don jingmut aïu ban dang tohkit halor ka huri-hura kaba mih na ka ‘Public Hearing’? Ka ‘Public Hearing’ hi ka dei na ka bynta ban ïoh ïa ka EC bad CTE,” u la ong.
Da kaba pynïasyriem ïa kane bad kiwei pat ki komiti, u Bah Sambormi u la ong, “Peit ïa ka komiti halor ka jingthmu pynkynriah ïa ki Harijan na Them Metor, haduh mynta ym pat don kano-kano ka jingmih na ka. Ka komiti halor ka ‘Reservation Policy’ ruh kumjuh. Man ka por ba ki paidbah ki dawa ïa ki hok jong ki, ka Sorkar ka thaw ïa ki komiti ki bym ju poi shano-shano ruh.”
U la ong ba ka JNC kan bteng ban ïakhun tad haduh ba ïa ki hok jong ki trai jaka bad ki nongrep yn lah ban ïada.
