Nongstoiñ, Nailur 13
Ki arngut ki samla jong ka thaiñ Nongstoiñ kiba kynthup ïa ka samla Laveen Mawtyllup bad ka Abigail Marbaniang kiba dang pule ha ka skul Anderson Higher Secondary School Nongstoiñ ki la ong ba ka jingnang jingstad hi ka dei ka daw ka thong ka jingangnud kaba kongsan kaba ma ki, ki para samla jong ka Nongstoiñ ki kwah ba ka Nongstoiñ kan don namar kane ka juk, kam dei shuh ka juk jong ka wait lane ka suloi hynrei ka dei ka juk jong u khulom bad ka jingnang jingstad.
Ïa kane na ka liang kine ki ar ngut ki samla ki la pynpaw haba kren bad ki nongthoh khubor ha ka sngi Saitjaiñ jong ka taiew, hadien ka jingleit ïashim bynta ka jong ki ha ka thoh ‘essay’ halor ka phang “Ka jingïohi jngai jong nga na ka bynta ban kyntiew ïa ka Nongstoiñ ha ki liang baroh” ha ka rynsan ïakop ha kaba ïadei bad ka jingdro, thoh essay, mareh bad kiwei kiwei hapoh ka prokram kaba kyrpang ïa kaba la tip kum ka 2nd MLA Excellence Award 2026, ïa kaba u Bah Gabriel Wahlang, MLA ka Nongstoiñ u la plie bad ïadon lang.
Kitei ki ar ngut ki samla, ki la pynpaw ruh ïa ka jingaikhublei ïa u MLA uba la pynlong ïa katei ka rynsan ba lehse lyngba kine ki jingïakop kiba bun ki samla kin ïoh ban pyni ïa ka sap kaba ki don.
“Ka jingthoh ka jong nga, nga pyni ïa ka jingthmu bad ki jingmut kiba bha bad ka jingmut ka long ban ïohi ïa ka Nongstoiñ kaba bha kaba riew spah, nga kwah ruh ba ka Nongstoiñ kan roi kan par ha ka liang ka pule ka puthi, kan don ïa ki lad jingsumar kiba biang, ki surok kiba bha la ka long ha ki shnong bapher bapher,” ong kawei na kitei ki samla da kaba bynrap bad kyntu ruh ïa ki para samla jong ka dong bad ka thaiñ bad ka Jylla bad kin long kiba bha ban tei ïa ka lawei kaba bha ha kane ka Jylla.
Ki la ong ruh ban pynrulong ïa kane ka jingthmu, ka don kam ka jingïatreilang naduh ki shnong, ka sorkar, ki dorbar shnong, ki seng samla bad kiwei kiwei.
Kum ban shu pynkynmaw, ïa ki khusnam sha ki nongjop ha ki kyrdan bapher bapher jong kitei ki jingïakop yn sam ha ka 17 tarik u Nailur 2026 ha kaba ha katei ka sngi yn ai khusnam ruh sha ki samla kiba la wan shakhmat ha ki jingpule lyngba ki kyrdan bapher bapher.
