Shillong, Nailur 13
U Bah AL Hek uba dei u Nongïalam ka Bharatiya Janata Party (BJP) ha Meghalaya ha ka sngi Saitjaiñ u la ong ba u la sdang ban khroh ïa u MLA barim ka UDP Bah Jemino Mawthoh ban pynïasoh sha ka BJP naduh u snem 2021 bad u la ïaroh ruh ïa u kum u briew uba don ka nongrim kaba skhem bad ka jinglong ban shakri para briew.
Haba pdiang ïa u Bah Jemino sha ka BJP, u Bah AL Hek u la ong, “Mynta ka sngi, na ka liang ka BJP, ngi pdiang sngewbha ïa u Bah Jemino Mawthoh sha ka BJP.”
“Nga la buddien ïa u Bah Jemino naduh u snem 2021. Nga la leit bunsien sha ïing jong u ryngkat bad u in-charge barim jong ka Meghalaya ban pynsngewthuh ïa u ban ïakhun na ka BJP ha ka ilekshon MLA 2023,” la ong u Bah Hek.
Haba kdew ïa ka lynti ïaid u Bah Jemino hadien ba u la mih noh na ka UDP, u Bah Hek u la ong, “Shuwa ban rung ha kano kano ka seng saiñpyrthei, u la risain noh na ka UDP bad u la shong jar la bun bnai. Kata ka pyni ba u dei u briew uba don ïa ki nongrim kiba skhem. Um kwah ban shet kylla ne pynmong ïano ïano ruh. Uta u dei u Dr Jemino Mawthoh”.
“Nga la ithuh ïa u naduh ki por dang samla jong ngi ha ka por ba ngi dang trei ha ka Seng Samla Shillong. Nga la ïatreilang bad kiba bun ki sengbhalang, nga la ïohi ïa u. Halor ki degree bad ki kyrdan jong u baroh, kaei kaba u sngewthuh ka dei ka jinglong briew,” u la ong.
“Kaei kaba khraw shaphang u Bah Jemino ka long ka jinglong briew ban shakri ïa ki briew mar katjuh. Kata ka long kaba kongsan mynta. Ym ka jingngeit jong nga kaba halor jong nga, ym ka kyrdan jong nga kaba halor jong nga, halor jong baroh ka long ka jinglong briew. Lada phi nang ban burom ïa ka jinglong briew, lada phi nang ban shakri para briew, kata ka long ka lad kaba bha tam kaba phi lah ban long,” u la ong.
Halor ka jinglong jingman ha ka saiñpyrthei, u Bah Hek u la ong ba bun ki MLA ba mynta ki kwah ïasoh bad ka BJP bad u pynpaw ruh ïa ka jingshaniah ba ka BJP kan ïalam ïa ka Sorkar ha u snem 2028.
“Ngi la ïohi ïa ki jingjia kiba dang shen ha kaba bun ki MLA kila pynpaw ba ki kwah ïasoh bad ka BJP. Ka thong jong ngi ka long u snem 2028. To buh ïa kata ka jingong jong nga, u snem 2028 kan long ka Sorkar ba la ïalam da ka BJP ha Meghalaya. Ngi la shim ïa kane ka jingkular. Bun ki jingjia kin wan ha ki sngi ban wan, hynrei ngi hap ban pynthikna ba ngin trei shitom,” u la ong.
“Lada baroh ngi trei shitom, ngi thikna ba u snem 2028 un long u snem jong ka BJP,” u la bynrap.
Haba ïawer ïa ki nongtrei bad ki dkhot (Karyakarta) jong ka BJP ban pynkhlaiñ ïa ka seng ha man la ki constituency, u Bah Hek u la ong, “Baroh ki karyakarta naduh kiba don ha ki shnong ki thaw hapoh ka Jylla, naduh ki nongïalam ha Delhi, ki peit sha u snem 2028 kum ka Sorkar ba la ïalam da ka BJP. Mynta ngi hap ban shim ïa kane ka jingkitkhlieh. Uwei pa uwei u dkhot jong ka seng ki dei ban pynkhlaiñ ïa ka seng ha kano kano ka constituency ba ki don khnang ban ïoh kham bun ki nombar, namar ha ka saiñpyrthei ki nombar ki long kiba kongsan. Ka BJP ka don, hynrei ynda ngi la ïoh ïa ki nombar, ïa ka jingbun paid, nangta ngi lah ban ong ba ngi lah ban thaw ïa ka Sorkar ha Meghalaya.”
