Shillong, Nailur 13
Ka jingjia shah shim noh ka jingim ka heprit ba 4 snem ka rta, ha u khynnah uba dang hapoh ka 18 snem ka rta, kadei ka jingjia kaba la ktah matïong shisha ha ka imlang sahlang, khamtam lei-lei ïa ki kmie ki kpa katei ka heprit, kiba la ri la sumar ïa ka.
Kum ban shu pynkynmaw, kane ka jingjia kadei kaba la jia ha kawei ka shnong, kaba hap ha ka jingpeit jingkhmih ka thanad Rynjah, hadien ba katei ka heprit ka la jah na la ïing ha ka step ka 14 tarik u Nailur, 2025 bad dei ha ka 15 tarik u Nailur, 2025, ba la lap pat ïa ka metïap jong ka, na kawei ka jaka lang um kaba don ha kawei ka jaka ka bym da jngai than na ka ïingsah jong ka.
Kane ka jingjia, mynta ka la ïaid la shi snem, kumta ban sngewthuh kham bha kaei kaba ka ïing ka sem katei ka heprit ka la leh, la ïoh ban ïakren bad u Kpa katei ka heprit.
Ha ka jingïakren bad u kpa katei ka heprit, u la ong ba kum ka ïing ka sem, watla ka jingjia ka la ïaid mynta la shi snem, hynrei ka jingkynjah kan sah beit ha ki baroh shirta, namar ka jingduh ïa la ka khun.
U la ong, ba ka shong ha ka bor jong ka aiñ ban pynlong ïa ka jingbishar kaba hok halor ka jinghah pynïap ka khun.
“Kumba ki pulit ki ong ba dei u khynnah ba hapoh ka 18 snem baleh ïa katei ka kam, ka aiñ kadei ban pynsaja,” la ong u Kpa.
“Shisien ba lah duh, ka don beit hi ka jingsngew kynjah bad kum ki kmie ki kpa lei, ngim lah shuh ban klet. Haba lah pynthikna ba u dei u ta u khynnah, uba leh ïa kum kane ka kam, kidei ban pynshitom mardor,” la bynrap u Kpa.
Kumta u Kpa katei ka heprit u la kyrmen, ba kum kane ka jingjia kam dei shuh ban dangjia nangne shakhmat, bad kan jah noh shisyndon, bad kyntu ba ki bor jong ka aiñ, ba kidei ban shimkhia khnang ba kum kine ki jingjia kin nym wan shuh.
