Shillong, Nailur 13
U General Secretary barim ka UDP Bah Jemino Mawthoh ha ka sngi Saitjaiñ u la ïada ïa u President ka UDP Bah Metbah Lyngdoh hapdeng ka khubor ba 8 ngut ki MLA jong ka ki kwah ban pynïasoh bad ka BJP namar ka jingbym lah treikam jong u nongïalam.
U Bah Jemino uba la pynïasoh sha ka BJP ha ka sngi Saitjaiñ u la ong ba ka UDP ka la lah ban khlaiñ ar shah hapoh ka jingïalam jong u Bah Metbah.
“U Bah Metbah u dei u briew uba don burom. Nga la ïatreilang bad u kum u general secretary bad ngi la ïadon ka jingïadei kaba bha. Dei ha ka por ba ïalam ma u bad nga kum u general secretary ba ka seng ka la kiew na ka 6 ngut sha ka 12 ngut ki MLA bad ruh ban jop ïa baroh saw tylli ki ilekshon shiteng samoi,” u la ong haba kren sha ki nongthoh khubor.
“Kumno ngin ong ba ka dei namar u nongïalam? U la pyrshang katba lah ban pynneh ïa ka seng. Ka jingbym sngewhun kan don beit ha kano kano ka seng saiñpyrthei namar ka jingkylla jong ka saiñpyrthei,” u la ong.
Halor ka jingkylli hato ki MLA ka UDP kim sngew tynnad shuh, u Bah Jemino u la ong ba um pat ïakren bad ki hynrei yn pdiang sngewbha ïa ka sienjam ba ki thmu ban shim.
“Ngam pat ïoh ban ïakren bad ki, kumta ngam tip la ki kmen ne em. Nga la ïohi ha ki kot khubor ba ki la thmu ban ïasoh bad ka BJP bad ki don ïa ki daw jong ki. Nga la kular ha ka BJP ha u snem ba la dep hi. Lada ki wan, kata, kat nang bun katta ka nangbha,” u la ong.
U Bah Jemino u la kam ba ha Meghalaya ka jingïathuh khana saiñ hima sima ïa ka BJP ka la sdang kylla bad ïathuh lypa ba kan nangkiew ha u snem 2028.
“Lada phi peit ïa ka jinglong jingman ka saiñpyrthei ha Meghalaya, ka la sdang don ka jingkylla bad ka jingïakren shaphang ka BJP. Ngi lah ban don arngut ki MLA mynta, hynrei mano ba lah ban ong ba ngin nym don kham bun ha u snem 2028? Ka NPP ruh ka don tang arngut ki MLA mynshwa bad mynta ka la don palat 20 ngut. Ngi ruh ngi lah ban ïoh ïa ka jingkyrshan jong u paidbah,” u la ong.
Haba kylli kaei kaba bakla hapoh ka UDP, u la ong, “Kam don eiei kaba bakla hapoh ka UDP. Nga la trei kum u Working President ar snem, general secretary haduh khyndai snem bad MLA san snem. Ngi la pyrshang katba lah ban pynïasoh lang ïa ki seng riewlum hynrei ngim shym la lah ban pynlong ïa ka. Nga sngew ba kam poi shano shano ruh.”
Halor ka daw kaba don ha lyndet jong ka jingbym sngewhun jong ki MLA ka UDP, u Bah Jemino u la ong ba ka mih na ka jingtreikam jong ka Sorkar MDA.
“Ka UDP ka dei ka bynta jong ka Sorkar MDA. Na kaei kaba nga la ïohsngew hangne hangtai, ka dei namar ka jingduh jingkyrmen namar ba kim lah ban leh katkum ka jingkhmih lynti jong ki,” u la ong.
“Ngam shym la don ka jingïakren bad ki, hynrei na ki khubor, nga pyrkhat ba kata ka dei ka daw,” u la bynrap.
