Babu Kular Khongjirem
Ka jingkwah pynlong (conduct) ka Sorkar Meghalaya lyngba ka Education Dept lyngba ka jingpynbna Sorkar (official notification) mynshem snem kaba la bthah ïa ka Meghalaya Board of School Education (MBOSE), Tura ba ka dei ban pynlong Exam SSLC (matric) noh ha u bnai Nohprah (December) ka la urlong shisha mynta u snem ha kaba ka MBOSE ka la pynmih syndon da ka Routine ne programe jong katei ka Exam ka ban sdang naduh ka 4th haduh 16th u December 2026. Ha ka jingshisha, kane ka dei ka sien kaba ar ba ka MBOSE kan pynlong Exam ha u December. Ha ki snem 1984, 1985, eiei, ka MBOSE ka la pyrshang (trial) ïa ka HSLC Exam. (Ka Exam ha kito ki por), hynrei kam long (not practical) bad ka sa phai biang (reversed) sha ki bnai February bad March eiei.
Katkum ka jingpynbna ka MBOSE, ka tarik ba khatduh ba ki skul bad ki khynnah kiba kwah ban ïaleh SSLC 2026 kin pynrung kyrteng (Online system) ka long ha ne shwa ka 25th Sept, 2026. Lada don kiba slem pyndap form palat ïa katei ka tarik, ki khynnah kin hap siew bai kuna slem (late fine) sa 400/ na ka bai Exam ba la buh (original exam fees).
Kumba ka long hi mynta, don ki skul kiba la dep pynlong ïa ka Selection Test. Don pat kiba dang ïaid shakhmat. Don ruh ki ban sa ai risol ha ka taïew ban wan katkum ka jingpynbeit jong ki bor pynïaid skul bapher bapher. Ki Candidates Regular bad ki Private Candidates (Pvt with Selection Test) ha East Khasi Hills te, ki la dep ïoh Result naduh ka 11th Sept, 2026 katkum ka jingpynbeit jong ka ophis DSEO, East Khasi Hills District, Shillong. Hynrei, ki lynnong pat ban pyndep lut, ïa ka course SSLC dang bun ki skul ki ban dang pyndep nangne shakhmat lait noh, tharai, tang ki katto katne ki skul kiba kham kloi ne sted ki la lah ban dep Course ha kine ki bnai. Ka daw ka long ba bun bah ki lynnong (chapters) ba dei ban pyndep ne leh, hapoh ka por kaba lyngkot pat.
Ka jingkylli mynta ka mih, hato! ka biang ne em ban pynlong Exam SSLC ha ki bnai December?
Mynshem snem ha ka jingïalang ba la khot ka MBOSE ïa ki bor pynïaid skul baroh ban pan jingmut halor ka jingpynlong ïa ka Exam SSLC ha u bnai December, ki nonghikai bad ki bor pynïaid skul ki la ïa ai ïa la ka jong ka jong ka jingai jingmut (different opinions and suggestions). Don kiba kyrshan bad don ruh kiba pyrshah. Kiba kyrshan ki ong ba, ka biang bha namar ki khynnah ki dang lah ban kynmaw (fresh) bha ba ki dang shu dep long skul. Ka jingpynbeit paper (Evaluation duty) ki ong, dei ban leh tad haduh u bnai January syndon namar u bnai December u dei u bnai lehkmen (festive month). Ki skul kin ïaid beit naduh u bnai February eiei khlem kano-kano ka jingpynwit ne pynthut shuh.
Ki don ruh ki bym ïahap satia namar u bnai December u dei u bnai ba ki bunkam ban pynbeit paper ïa ki Exam skul ïa ki klass bapher-bapher haduh class IX. Bun ki nonghikai ki kwah pyllut ïa ki por shuti jong ki ha kiwei-kiwei ki kam ba ki kwah pyllut. Hynrei kaba kham kongsan eh ba ki pyrshah ka long ba ki National Boards kum ka ICSE, CBSE, etc kin sdang baroh ïa ki Exam jong ki ha ki bnai March eiei bad ka Result kin ïoh haduh u bnai May eiei bad ka jingpule kaba thymmai (new session), jong ki pat kan sdang naduh ki bnai June eiei. Lada ka MBOSE kan pynbna ïa ka Result ha ki bnai March, kata ki khynnah kin hap ban ap kai haduh 3 ne 4 bnai eiei ïa ki klass ba thymmai jong ki. Lada ki khynnah na Meghalaya (MBOSE) kin sdang shong ïing naduh u bnai December haduh u bnai June, kata, kin shu bthi kai ei ka jabieng jong ki? Kumno ki khynnah Meghalaya kin sdang long klass hi naduh u March ne April haba ki khynnah jong ki Central Board pat kim pat ïoh Result satia? Hato! Ka long seh ban pynlong klass tang ïa ki khynnah ba pass na MBOSE khlem ki khynnah na Central Board? Kumno ki khynnah kiba kwah ban leit pule shabar ka jylla (outside the state)? kin hap ban ap shitom haduh ki bnai June namar shabar ki klass thymmai (new session) bun hi kin sdang naduh u bnai June ter ter. Kine ki long ki katto katne kiei-kiei kiba ka Sorkar Meghalaya kan hap ban pyrkhat khia bha ba ïoh ka long pynban ka apot, ka jingjynjar bad ka jingduh nong ne duh jingkyrmen (desperate) pynban ïa ka jingpule (academic career) jong ki khun samla jong ngi.
