Nongstoiñ, Nailur 14
Ha ka sngi Nyngkong jong ka taiew ka Hynñiewtrep Youths’ Council (HYC) West Khasi Hills District hapoh ka jingïalam u samla Lumlang Kharsyiemlieh, President kala leit ban ïakynduh ïa ka Deputy Commissioner (DC) West Khasi Hills District halor ka jingslem bad khlem sam khaw rashon la ar bnai hapoh ka West Khasi Hills District naduh u khaw NFSA (PHH and AAY) bad Non NFSA.
U samla Lumlang u la ong ba ka seng ha kane ka jingleit ïakynduh, ka kyrpad ïa ka DC ban ïarap tuklar lem khnang ba ki duk ki suk kin ïoh ïa ka hok.
U la ong ruh ba na ka liang ka seng hadien ka jingïatai bad ïakren bad ka DC, ka la ïathuh ba ka jingeh jong ki halor kane ka dei ba ka shnong Pyndengrei kam shah shuh ban rung ki kali heh hapoh FCI.
U la ong ruh ba ka seng kam tuklar ïa ka jingïadei ka ophis FCI lane DC ophis bad ka shnong hynrei ka HYC ka kwah ba u khaw rashon u dei ban poi sha ki paidbah ka West Khasi Hills District.
U la ong ruh ba hadien ka jingkyrpad, ka DC ka la ong ba kan sa wad ki lad ki lynti ban pynpoi sha ki paidbah.
Nangta, kala ong ruh ba kan ïatai bad ki wholesale bad ban wad ki kudam ba shipor tang ban bit biang ki paidbah.
