Shillong, Nailur 14
Katba kiwei pat ki Jylla ka ri ki ïaid sha ka 8th Pay Commission, ki nongtrei Sorkar jong ka Meghalaya pat ki dang sahkut ha ka 5th Pay Commission.
Ka Meghalaya State Government Employee Federation ha ka sngi Nyngkong ka la rah ïa kane ka mat beit-beit sha u Myntri Rangbah ka Jylla u Conrad K Sangma, da kaba dawa ban khmih bniah bad pynkylla noh mardor ïa ka jingsiew tulop.
“Ngi la aiti ïa ka dorkhas ban pynthymmai bad pyntreikam ïa ka ‘revised pay’ ïa ki nongtrei Sorkar”, la ong ka Secretary General ka Federation Kong Banshari Kharshandi hadien ka jingïakynduh ïa u Myntri Rangbah.
Ka la ong ba ka Delhi ka la dep pynkylla ïa ka jingsiew na ka bynta ki nongtrei ki tnad Sorkar Pdeng, hynrei ka Meghalaya ka la shah ieh sahdien.
“Ka Sorkar Pdeng ka la dep ban pynkylla ïa ka jingsiew na ka bynta ki nongtrei jong ka. Ngi kwah ba u Myntri Rang-bah jong ngi un bishar bniah ïa kane bad ban ai ïa ka jingsiew ba la pynkylla ïa ki nongtrei ka jylla,” ka la ong.
Ka Kong Kharshandi ka la ong ba ki nongtrei ki la duh ar tylli ki jingpynkylla ba pura.
“Ka jingpynkylla kaba khatduh jong ngi ka long ha u snem 2017, hynrei ngi la duh ha u snem 2006, bad ngi la duh biang ha u snem 2016. Ka Sorkar Pdeng ka pynkylla man la ka 10 snem man ka por, hynrei ngi la mad ïa ka jingduhnong kaba khraw,” ka la ong.
“Ngi dang don ha ka 5th Pay Commission. Wat ha ka thaiñ Shatei Lam-Mihngi, ki Jylla ki la ïaid sha ka 7th Pay Commission bad mynta ki dang khmih sha ka 8th Pay Commission. Ka Meghalaya pat ka dang neh bad sahkut ha ka 5th Pay Commission,” ka la bynrap.
Ka la ong ba u Myntri Rangbah u la pynthikna ba yn sa eksamin ïa kane ka kam.
“Ka shong ha ka Sorkar mynta ban shimkhia ïa kane. Ngi kwah ba ka Sorkar kan pyrkhat khia ïa kane ka jingtyrwa jong ngi,” la ong ka Kong Kharshandi.
