Shillong, Nailur 14
Ka Hills Farmer Union (HFU) ha ka lah sngi u Blei ka la ïoh ban kynduh ïa u Myntri Rangbah ka Jylla u Conrad K Sangma ban pynpaw ïa ki jingdawa ban buh ïa ka Check-up Point bad ka Quarantine Centre na bynta ban peit bniah ïa ki sniang ba wan nabar.
Kane ka jingïakynduh ki nongïalam jong ka HFU ka dei hadien saw sngi ba ki nongrep bad ki nongri sniang ki la mih paidbah ha surok ban pynlong ïa ka jingïaid paidbah ba jai-jai ha ryngkat ki sniang, na mot Kiang Nongbah, Barik, Malki Point bad pynkut ha madan Malki, namar ka jingïap khlam ki sniang ha ka Jylla.
Haba kren sha ki nongthoh khubor, u President ka HFU u Bah Commander Shangpliang ula ong ba ki la ai jingmut ïa ka Sorkar ban buh ïa ka Check-up Point ha man ki thaiñ khappud bad ïa mynta kaba kham kongsan bha ba ka Sorkar ka dei ban buh ka long ha Umling lane Jorabat, namar ba kiba bun ki sniang bad kiwei ki mrad shohdoh ki wan lyngba ka National Highway 6.
U Bah Commander u la ong ba ki nongri sniang ka Jylla ki la dawa na ka Sorkar Jylla ba ka dei ban siew bai lutksan ïa ki nongri jingri hadien ba ki sniang ba ki shim lyngba ka Piggery Mission, ki la ïap na ka daw jong ka jingpang khlam ka African Swine Flu bad ki la dawa ruh ba ka Sorkar kan map noh ïa ka ram jong ki nongri sniang kiba la shim na ka Piggery Mission.
Halor kane, u Bah Commander u la ïathuh ba na ka liang u Myntri Rangbah u la ong ba un sa bishar bniah ban kynduh ïa ki briew jong ka tnad Veterinary na bynta ban peitbniah halor kine ki mat jingdawa. “Ngi don ka jingkyrmen ba ka Sorkar kan buh ïa ka Health Check-up, khnang ba ki sniang kiba wan nabar kin ym long kiba wanrah jingpang ïa ki sniang ba na ka Jylla” ula ong.
Shuh-shuh u Bah Commander u la pynpaw ba ki la ïohlad ruh ban pynsngew ha u Myntri Rangbah halor ka jingeh ki nongrep kum ka jinghiar dor ki mar rep bad ki la dawa ba dei ban wanrah da ka Agriculture Policy ka ban long ka jingïarap ïa ki nongrep.
U la ïathuh ba na ka liang u Myntri Rangbah ka Jylla u la pyntip ba ka tnad ka la dep wanrah ka Draft Policy bad pynpaw ka jingkyrmen ba ka Sorkar kan lah ban wanrah mynta u snem ïa ka Agriculture Policy.
