Nongpoh, Nailur 14
Ki bor pynïaid district ka Ri Bhoi ha ryngkat ki nongkitkam bad dkhot jong ka Meghalaya Commercial Truck Owners and Drivers Association (MCTODA) nalor ki bor ba dei khmih ka National Highway Authority of India (NHAI) bad na ka National Highways & Infrastructure Development Corporation Ltd (NHIDCL) ha ka sngi Nyngkong ki la pynlong ïa ka jingjurip ïa ki rud surok naduh na Jorabat ter-ter haduh ha Umran Niangbyrnai na ka bynta ban shna ïa ki jaka sangeh kali ne lay-by jong ki nongñiah trok.
Kumba long mynta, kane ka surokbah National Highway 6 kaba la ju tip ruh kum kata ka Umiam Jorabat Expressway ha ka liang ban hiar na Umiam ter ter shaduh Jorabat, kam don satia ïa ki jaka pynïeng kali (lay-by) kiba biang na ka bynta ki kali heh ne ki trok bad kane kala buh jingeh shikatdei ïa ki nongñiah trok na ka Jylla khamtam naduh ba la pynmih hukum ka Supreme Court ban nym shah ïa ki kali ban sangeh harud surok na ka bynta ka jingshngaiñ jong ki paidbah nongleit nongwan.
Haba kren sha ki lad pathai khubor, u Bah Moslander Marngar, Chairman ka MCTODA u la pynpaw ïa ka jingsngewkmen ban ïohi ba ki bor pynïaid district kila shimkhia ïa kane ka kam ban pynlong ïa ka jingjurip lang ïa ki jaka na ka bynta ban shna ïa ki jaka ïeng ki trok, kaba u la kam ba kane ka dei ka kam ïap kam im ym tang jong ki nongñiah ne ki trai trok, hynrei wat ki paidbah nongleit nongwan hi baroh.
U la ïathuh ba ha kane ka jingjurip, ki don ki jaka ki bym long namar ka jingheh jong ki lum bad ki don ruh katto katne ki jaka kiba biang bad ka por ban ap kam long shuh bad ba ki bor pynïaid District kila dei ban shna noh khlem da pynslem shuh, la ka dei ban sdang noh lashai lashai ne lashi sngi ruh, la dei ban sdang da kaba ong artad ba lada ka Sorkar ka sngew hiran pisa tyngka ruh, na ka liang ka MCTODA kan ïarap ban bynrap sei lang ïa ki jinglut jingsep, naba ki sngew ba kane ka dei ka kam ïap kam im.
U Bah Moslander u la ong ruh ba ha kane jingjurip, la lap tyngkrein bad paw shai ba ki don ki jaka ba la klun beaiñ da ki karkhana bar jylla ba ki ophisar kila thmu ban pynpra na ka bynta ban shna jaka ïeng kali, hynrei haba ki la leit ryngkat ki kor ki mashin la bun bun sien, ki la ïoh hukum ne phone nangne nangtai ban ai por shwa kumba 3 sngi, 7 sngi ne wat haduh 15 sngi ruh. U la ong ruh ba lada ïa ki nongñiah trok, da bakla tang tiak ruh la shah daiñ kuna bad shah rah sha thanad khlem ai por, u kyrmen ba nangne shakhmat ba kan nym dei shuh ban don kum kane ka jingleh shilliang khmat bad bynrap ba leh katba leh, long katba long, ki jaka ïeng kali la dei ban pyndep noh khlem da pynslem shuh.
