Shillong, Nailur 14
Ki nongñiah trok kiba ju kit ïa u khaw, jong ka Food Cooperation of India, ki la pynpaw ba ki la mad ka jingeh kaba khraw halor ka jingjah u khaw, kaba ju jia na ka por sha ka por.
Halor kane ka jingeh ki nongñiah trok ki la pyntip sha ki nongïalam ka Meghalaya Commercial Truck Owners and Drivers Association (MCTODA) ban ïakren lem halor kane ka jingeh ba ki mad.Kumta na ka liang ki nongïalam ka seng, ki leit ban ïakynduh ïa ki nongpeit jong ka kudam ka FCI kaba don ha Mawlai Mawroh, ban pan jingshai halor katei ka mat kaba ki nongñiah trok ki ïakynduh.
Haba kren sha ki lad pathai khubor, na ki liang ki katto katne ngut ki nongñiah trok ki la ïathuh ba ka jingjah u khaw ka long haduh 115 kilo, bad ong ba ka jingjah u khaw kam dei ba ki shah ot, hynrei ka don ka jingduna u khaw haba thew kilo. Ki la ïathuh ruh ba ha ka por ba ki thep na ka jaka ba load, ka jingthew ka biang, hynrei ynda la poi ha jaka pynhap pat u duna ka jingthew, kaba la pynlyngngoh ïa ki nongñiah trok baroh.
Namarkata, ki la ong ba kane ka jingjah u khaw ka ktah na ka pla jong ki trai trok, ha kaba ki shah ot ka bai kit.
U President ka seng, u Bah Moslander Marngar u la ong ba ka jingwan jong ki hangne ka long ban ïapynbeit ïa kane ka jingeh kaba ki nongñiah trok ki ïakynduh, da ka lynti kaba dei, namar ba kane kam dei ka sien kaba nyngkong, bad ka la dei kaba la jia bunsien.
