Shillong, Nailur 14
Ki kam tuh kam thiem ki dang ïai bteng na kawei ka sngi sha kawei pat bad ïa kane lah ban sakhi na ki jingjia shah tuh jong ki ar shaka, ka jingshah prong tuh ki ïing bad kiwei-kiwei.
Katkum ka khubor na ki pulit la ong ba kawei ka longkmie ka la ai ka jingujor ba ha ka 10 tarik mynta u bnai, ka ksiar kaba shongdor kumba T.2 lak bad ka pisa kaba long T.3500, ka la lap ba la shah tuh na ka ïing jong ka, kaba don ha Upper Mawprem, Shillong. Ka nongujor ka la suba jur ba lah ban dei ka nongtrei ïing kaba donkti ha kane ka kam.
U M Passah u la ai ka jingujor ba ha ka miet jong ka 10 tarik mynta u bnai, ki runar bym lah ban ithuh, ki la tuh ïa ka arshaka ka jong u, kaba don ïa u registration number ML05-AG-8736 na ka thaiñ Nongrimmaw, Laitumkhrah, Shillong. Kumjuh ruh ka Kong Grace R Manar ka la ai ka jingujor ba ha ka miet jong ka 9 tarik mynta u bnai, ki runar bym lah ban ithuh, ki la tuh ïa ka arshaka ka jong ka, kaba don ïa u registration number ML05-AA-3116 na Lawsohtun Block-V, Shillong.
Ha kawei pat ka khubor, u Manoj Thapa ruh u la ai ka jingujor ba ha ka step jong ka 11 tarik mynta u bnai, ki runar bym lah ban ithuh, ki la tuh ïa ka arshaka ka jong u, kaba don ïa u registration number ML05-V-0134 na Lapalang, Shillong.
Kumjuh ruh u Donboklang Khongsdam u la ai ka jingujor ba ha ka miet jong ka 10 tarik mynta u bnai, ki runar bym lah ban ithuh, ki la tuh ïa ka arshaka ka jong u, kaba don ïa u registration number ML05-AD-8568 na Umpling Dong Shaneng, Shillong.
Ka Kong Angie Marbañiang ruh ka la ai ka jingujor ba ha ka miet jong ka 10 tarik mynta u bnai, ki runar bym lah ban ithuh, ki la tuh ïa ka arshaka ka jong ka, kaba don ïa u registration number ML05-AD-6780 na ka jaka sah jong ka kaba don ha Lummarboh, Nongrah, Shillong.
Ha kawei pat ka khubor, u General Manager ka Hotel Polo Towers, Shillong u la ai ka jingujor ba ha ka 11 tarik mynta u bnai ha ka por kumba 5.20 mynstep, ki runar bym lah ban ithuh, ki la tuh ïa ki ‘AC copper wires’ kiba shongdor kumba T.50,000/- na ka Hotel. Katba na ka liang jong uwei u rangbah uba dei u nongshong shnong jong kawei na ki dong ha nongbah Shillong u la ai ka jingujor ba ha ka 3 tarik mynta u bnai, ha ka por kumba 2.30 mynsngi, uwei u briew bym ithuh, uba la kam ba u dei u nongtrei ka Bank of Baroda, u la thok pisa ïa u haduh T.44,000/-.
Uwei u nongshong shnong ka nongbah Shillong u la ai ka jingujor ba ha ka 9 tarik mynta u bnai, ki runar bym lah ban ithuh, ki la knieh ïa ka mobile phone ka jong u, bad pyrshang ruh ban dung tari ïa u ha ka thaiñ Jail Road, Shillong.
