Shillong, Nailur 14
U Bah Ardent Miller Basaiawmoit, President ka Voice of the People Party (VPP) u la ong ba u Myntri Rangbah ka Jylla, u Conrad K Sangma mynshuwa um ju wan bam jadoh ha Smit, hynrei mynta pat khah-khah u wan bam jadoh.
“Kane kadei tang ka jingthmu ban pyntroin ïa u Bah Ardent, MLA ka Nongkrem,” ong u Bah Ardent haba kren ha ka sngi sam skhim MLA jong u snem 2025-26, kaba la long ha ïingsah jong u ha Nongkrem.
Haba kren pynsngew sha ki paidbah u Bah Ardent u la pynthikna ba ha u snem 2028, ka Voice of the People Party (VPP), kan sa kurup ïa ka bor synshar ha Secretariat.
U la ong ba kadei tang ka Voice of the People Party, kaba kren shai bad ban kren ïa ka nongrim, kata kadei ba ngin nym ïa peiñ hynrei ban rah ïa ka synshar kaba khuid bad ban ïada ïa ki trai muluk trai jaka.
“Nga kyrmen ba ki paidbah ki kham stad mynta ban ïa ki snem ba mynshuwa. Namar ki buh beit ka jaitbynriew hakhmat bad kam dei shuh ka ilekshon jong ka pisa,” la ong u Bah Ardent.
Namarkata, u la kyntu ïa ki nongkyrshan baroh ba kin kynmaw ban pynkhlaiñ ïa ki jingduwai ban shngaiñ ka ri bad ka jaitbynriew.
“Hooid phi ïohi ïa ka jingshah kynthoh u Bah Ardent, hynrei wat synei ïa u Bah Ardent, dei ban synei ïa ka jingshah ïalam bakla ïa ka lawei ki khun ki kti. Bad bun ruh mynta ki account thok tang ban beiñ ïa ka VPP bad khamtam eh ïa u President ka VPP,” la bynrap u Bah Ardent.
