Shillong, Nailur 14
U Bah Ardent Miller Basaiawmoit, MLA ka Nongkrem Konstitwensi, ha ka 14 tarik u Nailur, 2026, u la pyllait paidbah ïa ka MLA Scheme lyngba ka Special Rural Works Program (SRWP) jong u snem 2025- 26, ha ka jingïalang kaba la pynlong ha ka ïing jong u kaba don ha Lad Nongkrem.
Haba kheiñ kyllum ïa ka skhim kaba u MLA u la pyllait paidbah, ka la kot sha ka T.2.5 klur, ba kynthup ïa jingshna ïa 60 tylli ki ïing na bynta kiba duk ha ka jinglut kaba T.45 lak, ka jingtei bad jingshna pynbha ïa 180 tylli ki ïingsah kaba la kot sha ka T.45 lak, ka jingsam jingïarap sha 650 ngut ki nongrep bad small scale traders ha ka jinglut ba T.65 lak, ka jingshna ïa ka building ba thymmai ka Laitkor Presbyterian Secondary School ha ka jinglut ba T.20 lak.
Nangta ka jingsam ïa ki kor computer ha Don Bosco Higher Secondary School, Smit ha ka jinglut ba T.15 lak, ka jingshna ïa ka building skul ka St. Paul LP School, St. Peter Secondary School, Mawmuthoh Presbyterian LP School, ha ka jinglut ba T.15 lak bad T.5 lak sha ka St. John Bosco ban pynheh ïa ka building skul.
Nalor ka jingshna ïa ka Community Hall ka Nongkrem Nongkyndong ha ka jinglut ba T.10 lak.
Ha kane ka sngi, la ïadonlang u Dr. Kara Chen, Vice President ka VPP, Bah Brightstarwell Marbaniang, MLA ka Mawlai Konstitwensi, Bah Kitborlang Syiem, MDC ka Nongkrem Konstitwensi, bad kiwei-kiwei ki nongïalam ka VPP.
Haba kren ha kane ka sngi sam skhim u Bah Ardent u la kyntu ïa baroh kiba ïoh ïa kane ka skhim ba kin pyndep kloi ïa ka jingpyndap ki kot ki sla, ban wanrah sha u, khnang ba ka pisa kan nym sahkut sah ha Block bad kan poi noh ha kiba dei hok ban ïoh.
Kumta u Bah Ardent u la pule lut ïa ki kyrteng kiba ïoh pdiang ïa kane ka skhim, khnang ba baroh kin tip ban ban pyndep ki jingdonkam baroh.
“Kane kadei ka jingïoh jingmyntoi lyngba ka MLA Skhim. Ngi la sam ïa kum kane ka skhim naduh u snem 2008 hynrei ka la shu jah lynti noh hadien ba ngam shym la jop shuh ïa ka ilekshon MLA, hynrei mynta pat ka la long ka jingkyrkhu kaba khraw ïa ki paidbah jong ka konstitwensi lyngba kane ka skhim MLA,” la ong u Bah Ardent.
