Shillong, Nailur 14
U Bah Ardent Miller Basaiawmoit, u la ong ba dangshen ka jingkren pyrshah jong u Bah Aristotle Rymbai, nongïalam ki nonghikai SSA halor ka jingdawa ka VPP ban wengkam ïa u Vijay Kumar Mantri, Commissioner and Secretary ka tnad pule puthi ka Sorkar Jylla, lada ka shong nongrim kan pynsting ïa ka VPP, lada ka wan ha ka bor.
“Lada ka jingkren jong u President ka SSA, ka pynshong nongrim ba ki la hun ïa ka jingsiew tulop ka Sorkar, kan pynsting ïa ka jingkit jong ka VPP, bad kam donkam shuh ban pyrkhat ïa ki, lada ka VPP kan wan ha ka bor,” ong u Bah Ardent haba kren sha ki lad pathai khubor.
U Bah Ardent u la ther kylla da kaba ong, ba u nongïalam ka SSA uba pynpaw ka jingpyrshah ïa ka jingdawa ka VPP ban wengkam ïa u Vijay, u pyrta ‘Kot’ pynban ha kawei ka jingïalang baheh jong ka National People’s Party (NPP).
“Kane kadei kaba sniew, ba ngim salia shuh ban len ïa ka jingshisha, haba ngi don ha kano-kano ka party kaba synshar,” ong u Bah Ardent.
Kane ka durkhih ba pyni pyrta ‘Kot’ u Bah Aristotle Rymbai, ka la saphriang bha ha ki rynsan social media, kaba dei ha kawei na ki jingïalang jong ka NPP.
Ka la mih bun ki jingkylli bad kynnoh, ba u nongïalam ki nonghikai SSA, u don jingïadei bad ka NPP, naba paw ka durkhih ba u leit pyrta ‘Kot’ lang ha kawei na ki jingïalang, kaba u la ïeng lang ruh ha syndah u Bah Prestone Tynsong.
U Bah Ardent u la ong ba ka VPP kam kren tang ba pyrshah ba don daw shimet ïa ka Sorkar, hynrei hadien ba ka party ka lap, ba la shem ïa kiba bun ki daw bad dei halor kata ka nongrim ba ngi dawa weng noh ïa u Vijay Kumar Mantri.
U la ong ba ka VPP kam pyrshah ïa ka SPF, haba ïohi ba ka Sorkar ka pyrshang ban pynïaid lyngba ïa kine ruh da ka SPF.
“Ngi kwah, haba don ka lad ka lynti dei ban ai ka tulop kaba bit ïa ki nonghikai. Mynta ka Sorkar ka ong ba lada thep kam ha ki skul Sorkar, kan ïaid lyngba ka SPF, kaei kaban jia ïa kiwei pat ki ban rung hapoh ki ar snem. Ngi ïohi ba u Commissioner and Secretary ka pule puthi, u long ka dawbah ban pynmih ka kynrum kynram ha ka tnad bad um pat long biang pura ban bat ïa ka kam,” la bynrap u Bah Ardent.
Halor ka jingïohi lyngba ki rynsan social media ba u Bah Aristotle u la pyrta ha ka ‘Kot’ ha kawei na ki jingïalang, u Bah Ardent u la pynpaw ba kam long kaba dei ïa ki nonghikai ba kin pynpaw ïalade ban don ka jingïadei bad kano-kano ka party sengsaiñ hima sima.
“Ngi shim ba ka jingkren jong u nongïalam ki nonghikai SSA, ki la hun katto kaba ki ïoh bad ka VPP kan hap pynleit jingmut ha kiwei pat ki skul,” u la ong.
