Shillong, Nailur 15
Palat 82% ki ‘Hearing’ hapoh ka Special Intensive Revision (SIR) 2026 la lah ban pyndep ha Meghalaya, ha kaba la lap ba ki don 542 ngut ki nongthep ‘vote’ ki ban ym ïoh shuh ban thep ‘vote’ haduh mynta.
U Chief Electoral Officer (CEO) ka Jylla, u Dr. B.D.R. Tiwari u la ong ïa kane ha ka Sngi Ba-ar hadien ba u la pynlong ïa ka jingïalang khmih bniah (Virtual) bad ki Deputy Commissioner, ki District Election Officer, ki ERO bad ki AERO, nalor ki nongmihkhmat jong ki sengsaiñ pyrthei ba la ithuh.
Na ki 21.69 lak ngut ki nongthep ‘vote’ ha ka ‘Draft Roll’, la pynmih ïa ki notis na ka bynta 6,51,735 ngut. Na kine, ki don 6,46,397 tylli ki notis kiba la dep ban pynpoi katba 5,190 tylli ki dang sahteng, ong u Dr. Tiwari.
“Baroh ki don haduh 5,36,468 tylli ki ‘Hearing’ kiba la pynlong; kaba long 82.31% na ki notis ba la pynmih,” u la ong.
U CEO u la pynskhem ba yn ym pynduh ïa uno-uno u nongthep ‘vote’ khlem da ïaid lyngba ka jingkhmih bniah kaba biang.
“Ka jingpdiang ïa ka notis kam mut ban pyndam hi noh mardor. Yn ym pyndam ïa kano-kano ka kyrteng kaba paw ha ka ‘Draft Electoral Roll’ khlem da bud ïa ka rukom treikam ba la buh bad ai ka lad ka kabu kaba biang na ka bynta ka ‘Hearing’,” la ong u Dr. Tiwari.
U la ong ba ki notis ki kynthup ïa 2,22,786 tylli kiba hap ha ka ‘No Mapping’ bad 4,28,949 tylli ki bym ïahap ha ka ‘Mapping’.
Halor ki jingkam bad ki jingpyrshah, ka Jylla ka la ïoh pdiang haduh 17,061 tylli ki aplikeshon hadien ba la pynmih ïa ka ‘Draft Roll’, ba kynthup ïa 9,343 tylli ki ‘Form 6’ na ka bynta ban pynrung, 1,076 tylli ki ‘Form 7’, bad 6,642 tylli ki ‘Form 8’ na ka bynta ka jingpynkylla bad jingpynbeit.
U Dr. Tiwari u la kyrpad ïa ki nongthep ‘vote’ kiba dei hok bad kiba ki kyrteng ki jah na ka ‘Draft’ ba kin thep ïa ka ‘Form 6’ ha ryngkat bad ka jingpynbna ba la buh hashuwa ka tarik ba la buh, kata ka 18 tarik u Nailur.
U la pyntip ruh ba ki don 1,814 ngut ki Booth Level Agent (BLA) kiba la thung da ki sengsaiñ pyrthei ban ïarap ïa ki nongthep ‘vote’ – NPP – 736, BJP – 393, VPP – 320, INC – 186, UDP – 121 bad AITC – 58.
Haba pynkynmaw biang ïa ka jingthmu jong kane ka sienjam, u CEO u la ong, “Ym don uno-uno nongshong shnong uba dei hok uba la shah iehnoh bad ym don briew u bym dei hok uba la shah kynthup lang.”
Ka jingpynbeit ïa ki jingkam bad ki ‘Hearing’ kan bteng haduh ka 17 tarik u Risaw, katba ïa ka thup kyrteng ba khatduh ki nongthep ‘vote’ yn pynmih ha ka 21 tarik u Risaw.
