Shillong, Nailur 15
U Myntri Rangbah ka Jylla, u Conrad K. Sangma ha ka Sngi Ba-ar u la pynbna ba ka Sorkar kan sa thaw ïa ka tnad ‘Civil Aviation’ kaba kyrpang hapoh ka tnad Transport ban pynïaid ïa ki kam liengsuiñ ba nang kiew jong ka Jylla.
Ïa kane ka rai la shim ha ka jingïalang jong ka Kynhun Myntri kaba la long ha ka Sngi Ba-ar.
U Conrad u la ong ba ka Jylla ka sakhi ïa ka jingkiew kaba khraw ha ka liang ki jingtei ba ïadei bad ki liengsuiñ, kynthup ïa ka jingpynheh ïa ka lynti ïaid liengsuiñ ha Kad Liengsuiñ Umroi, ka jingpynim biang ïa ka Kad Liengsuiñ Baljek, bad ka jingtei ïa ki ‘Heliport’.
U la ong ba kine ki projek, ryngkat bad ki jingthmu ban sdang ïa ka kam jngohkai pyrthei da ki ‘Helicopter’, ki donkam ïa ka jingpynleit jingmut kaba tikna ha ka jingpynïaid kam.
“Ka ‘Aviation’ ka dei ka tnad kaba heh bha kaba donkam ïa ka jingïatreilang kaba ïajan bad ka Sorkar Pdeng bad kiwei-kiwei ki tnad treikam. Ïa mynta, ym don ophisar ba aiti lut bad u Commissioner & Secretary ki pynïaid ïa kane ryngkat bad kiwei-kiwei ki kam,” u la ong.
Katkum ka jingong jong u Myntri Rangbah, kane ka shnat treikam bathymmai kan don ïa ki ophisar kiba kyrpang tang na ka bynta ki kam liengsuiñ.
Halor ki ‘Heliport’, u Conrad u la ong ba la dep ban mang na ka bynta ka Shillong bad Tura bad ka jingtrei ka dang ïaid shakhmat na ka bynta lai haduh saw tylli ki jaka, kawei na kine kan long ha Sohra, ban kyntiew ïa ki lad pynïasoh bad kam jngohkai pyrthei.
