Shillong, Nailur
Hapdeng kiba bun ki jingpyrkhing ban tehlakam ïa ki briew kiba niah khlemakor ïa ki kali, khamtam ki ar shaka, hynrei la don pat ki katto-katne kiba niah ïa ki ar shaka kiba pynkheiñ ïa ki kyndon aiñ bad ban sdang ban ïaid na ki jaka kiba la buh kyrpang na bynta ki paidbah.
Ia kane la lah ban sakhi lyngba haba la ïoh ban ringdur ïa ki katto-katne ki nongniah arshaka kiba la rung na ka lynti ïaid kjat ha Wards Lake, kaba don ha syndah ka Botanical Garden.
Kane ka lynti ïaid kjat, kadei kaba na Camel Back Road ka ban mih sha Quinton Road, bad kaba kham lyngngoh ka long ba wat hapdeng ka jingdon ki nar kiba la shna kyrpang ban khanglad ïa kiba niah ar shaka ban pyndonkam ïa katei ka lynti, hynrei kine ki briew ki la ïohlad ban rung bad ban pyndonkam ïa katei ka lynti ha ka leit ka wan.
Watla ki la don ki pulit CRPF kiba la beh noh ïa kitei ki briew, hynrei la lah ban sngewthuh ba kane ka kam ka dei kaba ïai bteng na ka por sha ka por bad kaba buh jingma ruh ïa kiba ïaid ba ïeng ha katei ka lynti ïaid kjat bad khamtam lei-lei, ba kadei ka lynti ka bym don ïa ki street light bad kaba dum tliw tliw.
Ha ka jingpyrshang ban wad bniah halor kane ka bynta, na ki liang ki bor pynïaid ka tnad tourism watla kim shym la treh ban kren lyngba ka durkhih, hynrei ki la pyntip, ba katei ka lynti ïaid kjat kadei ka jaka kaba jur ki kam sniew khamtam ha ka por mynmiet.
Ki la ong ruh ba na ka liang ka tnad ka la shimkhia halor kane ka kam bad kiba la don ruh ka jingthmu ban shna pynbha ïa katei ka lynti ïaid kjat, naduh ka jingbuh ïa ki street light nalor kiwei-kiwei de ki jingdonkam.
Nalorkata, ki la ong ruh ba ïa mynta ki dang ap tang ïa ka clearance na ka tnad forest, khnang ba kin ïoh ban sdang noh ïa ka kam.
