Jowai, Nailur 15
Ka Kiang Nangbah Government College, Jowai ha ka 15 tarik Nailur kala rakhe ïa ka sngi seng ne Foundation Day kaba 60 snem jong ka jingnoh synniang sha ka pule puthi kaba kham shalor ha ka thaiñ.
Ha kane ka sngi la donlang u Commissioner & Secretary ka tnad pule puthi ka Sorkar Jylla u Vijay Kumar Mantri, IAS kum u kongsan, uba la pynpaw ïa ka jingdonkam ban pynkhlaiñ ïa ki jingtei, bad ka jingthmu kaba jngai na ka bynta ka jingkiew jong ka jaka pule.
Haba ai jingkren sha ki paidbah, u Vijay Kumar Mantri u la ïaroh ïa ka pateng kaba riewspah bad ka jingnoh synñiang jong ka Kiang Nangbah Government College sha ki paidbah jong ka Rilum Jaiñtia bad ïa ka jingaiti lut jong u Principal, ki nonghikai, ki nongtrei bad ki samla pule, bad u la kdew ba wat hapdeng ka jingmih jong ki katto katne ki jaka pule kiba thymmai, ka kolej ka dang ïai bteng ban khring ïa ki samla pule namar ka histori, ka burom bad ka nam kaba la slem bha. U la ai khublei ruh ïa ka jinglong trai bad ka jingsngew trai ba la pyni da ki samla pule shaphang ka jaka pule jong ki.
U la pynpaw ruh ïa ka jingdonkam ban pynkhlaiñ ïa ki jingtei, khamtam eh ban shna ïa ka jaka pule kaba biang kaba lah ban pdiang kumba 3000 ngut ki samla pule. U la pynthikna ba ïa ka jingdonkam jong ki jingtei jong ka kolej un sa rah bad ka Sorkar.
Haba ïadei bad ka jingïasngewthuh jingmut hapdeng ki samla pule, ki nonghikai bad ki bor pynïaid jong ka kolej halor ka jingpynkylla ïa ka bai skul, u la ai jingmut ban thaw ïa ka College Development Fund ban kyrshan ïa ka jingpynbha ïa ki jingtei bad kiwei kiwei ki kam pynroi jong ka kolej.
Shuh shuh u la pyntip ba yn sa khot noh shen ïa ki aplikeshon na ka bynta ka Chief Minister’s Scholarship kaba T.6000/-, bad pyntip ba ka Sorkar kan pyllait ïa ka Umbrella Scholarship jong ka 2-Installment na ka bynta ki samla pule hashwa ka Khristmas.
Haba kren halor ka jingkylla ka jinglong jingman jong ka pule puthi bad ka kam ka jam ha ka juk jong ka Artificial Intelligence, u Vijay u la pynshlur ïa ki samla pule ban pynleit jingmut ha ka jingpynwandur, bad ka jingpyrkhat tynrai.
Haba pdiang sngewbha ïa ki samla pule na shabar ka Meghalaya, u la ong ba ka jingdon jong ki kan ai ka jingshai kaba kham jylliew bad kan noh synniang sha ka jinglong jingman jong ka campus. U la pynshlur ïa ki samla pule ban wad bniah shabar jong ka thaiñ bad pyndonkam ïa ka jingnang jingstad, bad ka jingtbit jong ki ban pawnam ha ki bynta bapher bapher.
Ha ka jingkren pdiang u Principal ka kolej Ma Hercules Toi u la kdew ïa ka jingjop bad jingnoh synniang jong ka Kiang Nangbah Government College ha kine ki hynriew phew snem ba la leit noh bad u la kdew ruh ïa ki jingdonkam jong ka kolej.
Kum shi bynta jong ka jingrakhe, ka kolej ka la sam ruh ïa ki khusnam Silver Jubilee Awards sha ki nonghikai kum ka jingithuh ïa ka jingshakri ba aiti lut jong ki haduh 25 snem ryngkat bad ki khusnam sha ki samla pule kiba la ïoh Toppers.
La pynphuh pynphieng ïa kane ka sngi da ki jingrwai jingshad na ki samla pule kumjuh ki nonghikai.
