Shillong, Nailur 15
U Chief Electoral Officer (CEO) ka Jylla, u Dr. B.D.R. Tiwari ha ka Sngi Ba-ar u la ong ba ka Election Commission of India (ECI) kan sa rai ïa ka por na ka bynta ban pynlong ïa ka ilekshon shiteng samoi sha ka Shillong Lok Sabha hadien ba la pynkhreh ïa ka thup kyrteng jong ki nongthep ‘vote’.
Haba kylli shaphang ka por kaba lah ban pynlong ïa kane ka ilekshon shiteng samoi, u Dr. Tiwari u la ong, “Kan sa long kumba la rai da ka Election Commission of India.”
U la ong ba ka Commission kan sa shim ïa ka rai ynda la dep ïa ka SIR.
“Katkum ka jingpyntip jong ka Election Commission, kan long hadien ba la pynkhreh ïa ka thup kyrteng ki nongthep ‘vote’, nangta ka Commission ka lah ban shim ïa kano-kano ka rai bad ïa ka por yn sa pynbna da ka Commission. Kumta ha kane ka kynti, ngam pat lah ban ïathuh lypa ne ban kren eiei,” bynrap u Dr. Tiwari.
