Shillong, Nailur 16
Ka Hynñiewtrep Integrated Territorial Organisation (HITO) Ri-Bhoi District ha ka Sngi Balang ka la leit ban ïakynduh ïa u ADC ka Ri-Bhoi u Akash Marak ban buddien ïa ka jingkynnoh ba pyndonkam be-aiñ ka Riangdo Veneer ïa ka jaka jong ka Meghalaya Power Distribution Corporation Limited (MePDCL).
U Bah Marrius Mallai Secretary HITO Ri-Bhoi u la pynpaw ba kane ka kam ka la ïaid shakhmat hadien ka jingujor jong ka HITO Sengkmie, kaba la sdang naduh u bnai Lber 2026, halor ki jingkynnoh ba ka Riangdo Veneer ka la pynkheiñ ïa ki kyndon bad ki aiñ kiba ïadei ka jingtreikam jong ka.
Shuh u la ïathuh ba na ka liang ka ophis Deputy Commissioner’s ka Ri-Bhoi ka la phah ïa ka shithi Eviction sha ka Riangdo Veneer, kaba pyni ba ka jingbuddien jong ka Seng ka la poi sha kawei ka bynta kaba kham shai.
Kum ban shu pynkynmaw, ha u bnai Lber ka HITO ka la hiar sha Umïam ban tohkit hi halor kane ka kam bad ka la lap ïa bun ki jingkynnoh shaphang ka jingpynkheiñ kyndon ba kynthup ïa ka jingdon jong bun tylli ki mashin kiba katkum ka jinglap ka HITO, kim don ïa ki permit kiba biang ban pyntreikam katkum ki kyndon jong ka aiñ khlaw ka Sorkar Meghalaya.
