Shillong, Nailur 16
Ki runar bym lah ban ithuh ha ka sngi Balang ki la leit ban kawang petrol bom ïa ka ophis treikam jong ka Directorate of Mineral Resources (DMR) kaba don ha Risa Colony, ha kaba ka la wanrah ïa ka jingjulor jong kawei ka kali kaba la pynïeng hapoh ka phyllaw jong kane ka ophis.
Katkum ka tyllong khubor, la ong ba une u petrol bom ba la kawang, u la leit ban dei noh ïa kawei ka kali Alto, kaba don ïa u registration number ML05-AC-0429, kaba dei trai da uwei u ophisar jong katei ka Directorate, kaba la pynïeng ha ka bynta ba shakhmat jong ka phyllaw katei ka ophis.
Kane ka jingjia, ka la jia ha ka por kumba 3:20 eiei janmiet, ha ka por ba ki nongtrei ki dang don hapdeng ka jingtreikam hapoh katei ka shlem treikam.
Mar ïa ïoh jingtip halor kane ka jingjia, ki pulit na thanad Laitumkhrah mar mar ki la leit sha katei ka jaka ban pynlong ïa ka jingtohkit kaba bniah halor katei ka jingjia.
