Kumba ka paw mynta, imat ki mat jingdawa kiba ktah bad ba kum ka Jylla Meghalaya ka donkam bha ki lah ban urlong tang lada ki nongmihkhmat paidbah na ki seng saiñpyrthei bapher-bapher kin leit ban pynïasoh noh ïalade bad ka Bharatiya Janata Party (BJP). Ki khubor kiba la saphriang baroh shi katta ba kita ki MLA ka United Democratic Party (UDP) kin leit ban pynïasoh noh ïalade bad ka BJP, mynta ka paw ba kane kan sa urlong noh shisha bad ba ngin ap sa tang ïa ka sngi ba kin shah pdiang sha ka BJP. Ngi ïohi ruh ba wat u Bah AL Hek uba dei u nongïalam ka BJP ha Meghalaya ruh u la pynthikna ba ki 8 ngut ki MLA UDP kin sa rung noh sha ka BJP bad wat na ka liang ki katto katne ki MLA ka UDP ki la pynlong ruh da ka jingïalang paidbah ban pynsngew sha la ki nongkyrshan ïa ka jingthmu ka jong ki ba kin pynïasoh BJP, lada ka BJP kaba lamkhmat ïa ka Sorkar ha Delhi kan pynurlong ïa ki jingdawa kaba ki la buh hakhmat jong ka.
Kane baroh kumba ka paw bad kat kaba lah ban sngewthuh haba shit haba shai, ka dei lyngba kita ki mat kiba la buh hakhmat kum ka jingdawa ban pynbeit ïa ka jingeh ba mih na ka kam tih dewïong, ban pynrung noh ïa ka ktien Khasi ha ka Khyrnit ba Phra ka Riti Synshar ka Ri, pyntreikam ïa ka Meghalaya Residents Safety and Security Act bad pynkynriah ïa ka Harijan Colony na Them Iew Mawlong nalor kiwei-kiwei pat. Ngi ïohi ba kine ki mat ki dei kiba la dawa mynta la bun bun snem bad ki don ruh ki mat ba wat la mynjur da ka ïingdorbar thawaiñ ka Jylla ban pyntreikam noh hynrei kiba la shu sahteng kumto, khlem poi shano-shano ne ban ïohi dak eiei. Watla ka jingbuddien na ki liang ba bun halor kane ka la ïaid na kawei ka por sha kawei pat, hynrei ym ïoh jubab eiei na ka Sorkar India ba lamkhmat ka BJP. Hynrei mynta haba buh ka UDP hakhmat ïa kine ki mat kum ka jingkieng ban rung sha ka BJP, i kumba kine kin urlong noh shen.
Kane ka jingkular shimkhia jong ka BJP ïa kine ki mat, ka pynpaw ba ym don jingeh satia ban shimkhia bad pyntreikam ïa kino-kino ki mat, lada ka sngew don ka mon bad mynta na ki khubor kwah ïasoh BJP ki MLA UDP, ka pynpaw shai ba imat na ka bynta ka myntoi ha ka kam saiñpyrthei, ym don satia ki diengpyngkiang ban khanglad ïa kino-kino ki jingma, watla ki dei kiba la shu sahkut ha ki duli ne ki almari da ki phew snem. Haba don ka mon ym don jingkhang. Kane ka pyni ba na ka bynta ka jingmyntoi ïalade, ka BJP kam salia ïano-ïano ruh. Lada urlong bad treikam shisha ki mat, kan pyni ruh ba ka BJP kam burom shuh ïa ka rai ka ïingdorbar kaba dei ka sur u paidbah, kaba la mynjur da ki resolution halor ki katto katne ki mat ban pyntreikam noh hapoh ka Jylla.
Ngin ap sa tang ïa ka por ban peit ba kine kiei-kiei baroh kin long kam shisha, kumba la kular shimkhia da ki nongïalam BJP na Delhi kiba la khroh ïa ki MLA ka UDP ban rung sha ka seng jong ki. Lada ka long kumne, aiu kan jia nangne shakhmat ïa kiwei-kiwei pat ki mat jingdawa kiba donkam ban ïoh jingmynjur na Delhi. Hato baroh-baroh hap ban leit pynïasoh noh sha ka BJP.
