Shillong, Nailur 16
U Nongïalam ka BJP ha Meghalaya u Bah AL Hek ha ka sngi Balang u la ong ba ka jingthmu rung bad pynïasoh BJP jong ki phra ngut ki MLA ka UDP ka la long kaba thikna, da kaba pynpaw ruh ba u Myntri Kam Pohïing Amit Shah da lade u la dep ban ai dak halor kane.
“Nga la dep ban ïakynduh para marwei bad u Amit Shah, ha kaba u la kren shai ba kane ka kam ka la thikna,” la ong u Bah Hek bad bynrap ba ki jingdawa ba la buh hakhmat da ki MLA ka UDP yn kyrshan pura da ka BJP.
U Bah Hek u la ban ruh ba ki mat ba la rah da ki MLA UDP ki long kiba dei hok shisha bad na ka bynta ka jingmyntoi jong ka Jylla. “Ha ka jaka jong ka ILP, ngi lah ban leit da ka MRSSA. Ka ktien Khasi ka dei ban shah kynthup hapoh ka Khyrnit kaba Phra. Ïa kine baroh ngi dei ban burom, kine ki jingdawa ki dei kiba shonghok shisha,” u la ong.
“Na ka liang jong ka BJP ruh ngin ïakhun ïa kine. Ïa kine ki jingdawa dei ban pynurlong bad pyntreikam,” la bynrap u Bah Hek.
Ha kawei pat ka liang, u Bah Hek u la kyntait ban kynthoh eiei halor ka jingïakren ba shapoh bad ki jingdawa shimet jong ki MLA ka UDP.
“Ngam don jingtip eiei ïa kata. Kane ka dei ka jingïakren bad ki nongïalam na Delhi, ngam don eiei ban ong halor kane,” u la ong.
Halor ka khubor ba ka don ka jingïakren ban ïasam ïa ka bor bad ka shuki Symbud Myntri Rangbah, u Bah Hek u la ong ba ka rai ka shong bad ki nongïalam kiba halor. “Kata ka long la ki la dep ban ïakren bad ki nongïalam ba hakhlieh ka BJP. Ngi ieh ha ka jingstad jong ki nongïalam na Delhi,” u la ong.
“Kane ka shong ha ka rai jong u Myntri Rangbah. Ngi hap ban ïaid katkum ka jingpynbeit kum ki paralok ba ïatreilang,” u la ong.
Shuh shuh u Bah Hek u la kyntait pat ban ai ïa ka tarik ba ki MLA ka UDP kin pynïasoh pura noh sha ka BJP bad ong ba kane kan sa long beit. “Ngan nym pat lah ban ai ïa phi ïa ka tarik hynrei kane kan long beit,” u la ong bad bynrap ba u Amit Shah u la ai dak ba un sa wan hi dalade sha Meghalaya bad ha kaba yn sa ai dak sha ka State Unit ka BJP.
Haba pynsngew ïa ka jingsngew skhem halor u 2028, u Bah Hek u la ong, “Kumba nga la dep ban kren bunsien, u 2028 un dei u snem ba ka BJP kan lamkhmat ïa ka Sorkar ha Meghalaya.”
