Shillong, Nailur 17
Ka All Meghalaya Primary School Teachers Association (AMPSTA) ha ka sngi Palei ka la pynbna ba kan sdang da ka jingïakhih naduh 7 tarik Risaw ban pynpaw ïa ka jingpyrshah ïa ka hukum jong ka tnat Pule Puthi kaba pynhap ïa ki jingthung kam nonghikai thymmai ha ki Government LP School bad Deficit hapoh ka Structures Pay Framework (SPF).
Ka tnat Pule Puthi ha ka hukum ba la pynmih mynha ka 19 tarik Naitung ka kdew ba ka jingthung kam nonghikai thymmai ha ki Government LP School bad Deficit School naduh 2027-2028 yn pynhap noh ha ka thup jong ka SPF.
Haba ai jingïalang, u Dipak D Sangma, President jong ka Garo Unit AMPSTA, u la ong ba ka SPF la thaw kyrpang na bynta ki nongtrei kiba ïoh Fixed Pay, kum ki SSA, RMSA, Fourth Teachers, Science Grant bad Pre-Primary Teachers, hynrei kam dei ban long na bynta kiba la mang (Santion Post) bad ai jingmynjur da ka Sorkar.
Ki Deficit School kim dei ki skul shimet, hynrei ki dei ki skul ba ïoh jingkyrshan na ka Sorkar. Kumta, ka jingpyntreikam ïa ka SPF ha kine ki post kam don nongrim,” la ong u Dipak.
Na ka liang u Babu FC Shullai, General Secretary ka AMPSTA, u la pynshai ba ka Association kam dawa ban weng ïa u Commissioner & Secretary ka tnad pule puthi u Vijay Kumar Mantri, hynrei ka dawa ïa ka Sorkar ba ka dei ban pynbeit ïa katei ka hukum.
U la ong ruh ba ka AMPSTA kam dawa ban pyndam lut ïa katei ka hukum, namar don ki bynta jong ka hukum kiba ai jingmyntoi ïa ki nonghikai SSA, Adhoc, Fourth Teachers bad kiwei-kiwei.
Shuh-shuh u la ïathuh ba ki la dep ïakren ïa ki ophisar ka tnat Pule Puthi ha ka jingïalang jong ka Executive Committee kaba long ha Tura, “Ngi la shim rai ba lada ka Sorkar kam pyndam ïa ki kyntien Government bad Deficit, ngin sdang ïa ka jingïakhih kaba nyngkong da kaba ïaid rally ha ka 7 tarik Risaw 2026” u la ong.
Haba bynrap u la ong, “Lada ym don jubab na ka Sorkar, ngin pynlong ka jingïakhih kaba shi taïew ba ngin leit sha ki skul, hynrei ngin ym hikai ïa ki khynnah”.
