Shillong, Nailur 17
Ki kam tuh kam thiem ki dang ïai bteng na kawei ka sngi sha kawei pat bad ïa kane lah ban sakhi na ki jingjia shah tuh jong ki ar shaka, ka jingshah prong tuh ki ïing bad kiwei-kiwei.
Katkum ka khubor na ki pulit la ong ba ka Kong Balary Suchiang ka la ai ka jingujor ba ha ka 15 tarik mynta u bnai, ha ka por kumba 2.30 mynstep, ki runar bym lah ban ithuh, ki la tuh ïa ka arshaka jong ka, kaba don ïa u registration number ML05-AE-2491 na ka jaka sah ka jong ka, kaba don ha Mawblei Block-B, Shillong.
Na ka liang jong u Jerrion Pohti ruh u la ai ka jingujor ba ha ka 14 tarik mynta u bnai, ha ka por kumba 8 baje mynmiet, ki runar bym lah ban ithuh, ki la tuh ïa ka arshaka ka jong u, kaba don ïa u registration number ML05-AG-9634 na ka jaka sah jong u, kaba don ha Mawlai Mawdatbaki Pata Block-D, Shillong.
Kumjuh ruh u Lurshai Kharkrang u la ai ka jingujor ba ha ka shiteng miet jong ka 14 tarik mynta u bnai, ki runar bym lah ban ithuh, ki la tuh ïa ka arshaka ka jong u, kaba don ïa u registration number ML05-AH-6664 na ka jaka sah ka jong u, ha Nongmensong Langkyrding, Shillong.
Ha kawei pat ka khubor, u Pipiush M Sangma u la ai ka jingujor ba ha ka 13 tarik mynta u bnai, ki runar bym lah ban ithuh, ki la tuh ïa ka CPU jong ka computer bad ka keyboard napoh ka Community Hall kaba don ha shnong Sokadam Banggna (EGH).
U Dalman N Sangma pat u la ai ka jingujor ba ha ka 14 tarik mynta u bnai, ha ka por kumba 6.30 janmiet, ki runar bym lah ban ithuh, ki la tuh ïa ka arshaka ka jong u, kaba don ïa u registration number AS19-G-6977na ïew Songsak (EGH).
Katba na ka liang jong u Jointo Barman pat u la ai ka jingujor ba ha ka 14 tarik mynta u bnai, u la lap ba ki runar bym lah ban ithuh, ki la prong tuh hapoh ka dukan jong u, kaba don ha Chibinang Market, Chandisil (WGH) bad ban tuh ïa bun tylli ki ‘machine’ bad ki ‘machine parts’ kiba shongdor kumba T.5.49 lak.
Na ka liang jong u Head Teacher jong ka Lower Chandmari Govt. LP School (WGH) u la ai ka jingujor ba ha ka step jong ka 16 tarik mynta u bnai, ki runar bym lah ban ithuh, ki la tuh ïa ki tiar ilektrik bad ka pisa kaba long kumba T.20,000/-, napoh ka building jong ka skul.
