Shillong, Nailur 17
Da ka jingthmu ban weng ïa ka jingkulmar jingmut hapdeng ki nonghikai bad kiba kwah kam, ka tnad pule puthi ka Sorkar Meghalaya ka la weng noh ïa ka jingpynbna jong ka, kaba 12 tarik u Nailar kaba la ailad ban pyndap ïa ki kam ba lait jong ka State Pay Scale lyngba ka Structured Pay Framework (SPF).
Ka jingpynbna ba la pynmih da u Commissioner & Secretary Vijay Kumar Mantri ha ka sngi Palei ka la ong, “U Lat ka Jylla u hukum ba ïa ka jingpynbna kaba 12 tarik Nailar, 2026 la weng noh mardor.”
Ïa ka jingpynbna ha bnai Nailar (August) la pynmih katkum ka jingmynjur ba la pynsngew da ka tnad pla tyngka bad ruh ha kaba ïadei bad ka jingkular ban bei pisa shuh kaba mih na ka jingpyntreikam ïa ka SPF, kaba ailad ban pyndap ïa ki kam ba lait hapoh ka State Pay Scale lyngba ka SPF haduh u snem mang tyngka 2027-28.
Hynrei, ka Sorkar ka la kdew ba katei ka hukum “ka la wanrah ïa ki katto katne ki jingsngew artatien bad jingsngewthuh bakla hapdeng ki nonghikai Sorkar, ki nonghikai Deficit, bad ki kyrtong ha kaba ïadei bad ka jinglong jingman jong ki kam nonghikai Sorkar bad Deficit ba la mang bad ka lawei jong ka Deficit System bad ka Pay Scale Sorkar kaba la don lypa.”
Haba pynmih ïa ka jingpynshai, ka tnad ka la ong ba ka jingpynbna kam mut ba “ïa ka ‘deficit system ba la don lypa la bujli da ka Structured Pay Framework” lane ba “ïa kano-kano ka kam nonghikai Deficit lane kam nonghikai Sorkar ba la mang la pynduh, aiti ne pynkylla da ka kam SPF.”
Ka la pynshai ruh ba “Ki jingshakri kiba la don lypa, ki jingpynbeit jingsiew ne ka kyrdan jong ki nonghikai kiba la dep thung hapoh ka Deficit System ne ka Pay Scale jong ka Sorkar la pynkylla da ka jingpynbna ba la kdew.”
Ka jingpynbna ka ong shuh shuh, “Ka jingweng noh ïa ka jingpynbna ba la kdew haneng kan nym shim kum ka jingpynduh, jingaiti, jingpynkylla ne ban bujli ïa kano-kano ka kam nonghikai Sorkar ba la mang ne ka kam nonghikai Deficit ba la mang.”
Ïa katei ka hukum la pynmih ban wanrah ïa ka jingshai bad ban pynthikna ba ïa ka kyrdan ha kaba ïadei bad ka Deficit System, ka Government Pay Scale bad ka Structured Pay Framework la sngewthuh shai da baroh kiba don bynta.
