Shillong, Nailur 17
Ka Voice of the People Party (VPP) ha ka sngi Palei jong ka taïew, ka la ong ba ka jingweng noh ïa ka jingthung kam lyngba ka Structured Pay Framework (SPF), ka dei kum ka jingjop shi bynta jong ka jingïaid lynti jong ka.
Haba kynthoh halor ka rai jong ka Sorkar Jylla, ban wengnoh ïa ka ‘notification’ ba la pynmih ha ka 12 tarik Nailar 2026, u nongaiktien ka VPP, u Dr. AW Rani u la ong, “Ka VPP ka pdiang sngewbha ïa ka rai jong u Lat ka Jylla Meghalaya ban weng noh, da kaba treikam mardor, ka Education Department Notification No. EDN.9/2026/31, 12 tarik Nailur 2026, ka jingpyndap ïa ki kam ba lait hapoh ka State Pay Scale lyngba ka Structured Pay Framework ba la buh ryntih (SPF).”
“Ka VPP ka kheiñ ïa kane ka jingweng noh kum ka jingjop kaba shi bynta jong ka jingïakhih ba bteng jong ka jingpyrshah ïa ka jingpyntreikam ïa ka SPF, khamtam ha kaba ïadei bad ki kam nonghikai Sorkar bad Deficit, bad ka jingkylla bad kadei ka jingmyntoi jong ki nonghikai” u la ong
Da kaba ai khublei ïa ki nonghikai bad ki seng kiba la pynpaw ïa ki jingeh, ka VPP ka la ai khublei ïa ka jingïalam bad ka jingpyrshang ba ïaineh jong u President ka VPP, u Bah Ardent Miller Basaiawmoit, ha kaba shim ïa kane ka mat ki nonghikai.
Da kaba pynpaw ba ka jingbha jingmiat jong ki nonghikai, kadei ban long kaba kongsan tam, ka VPP ka ong, “Ka seng ka pynpaw biang ba ka jingmyntoi bad ka jingbha jingmiat jong ki nonghikai, ka jingïada ïa ki kam ba la ai jingbit bad ka jingpynkhlaiñ ïa ka rukom hikai jong ka Meghalaya, kadei ban long kaba kongsan tam.”
U la pynthikna shuh shuh ba ka Party kan dang ïai ïeng ryngkat bad ka jingdonkam jong ki nonghikai bad kan trei ban pynthikna ïa ka rukom hikai kaba hok, kaba shai bad kaba shngaiñ”.
