Shillong, Nailur 17
U MLA ka UDP na Mawphlang Constituency Bah Beyondstar Mathew Kurbah ha ka sngi Balang u la pynbna ba ka jingthmu pynïasoh jong u sha ka Bharatiya Janata Party (BJP) ka dei namar ka jingdonkam ïa ka roi ka par hapoh ka konstitwensi ka jong u, bad ong ruh ba kam pher lada u rem ha ka ilekshon MLA 2028 lada ka pynthikna ba ka jaidbynriew kan im.
Haba ai jingkren sha ki nongkyrshan ki jong u, u Bah Beyondstar u la ong ba ka jingdon ka jong ki nongkyrshan ka pyni ïa ka jingkyrshan kaba shai halor ka jingthmu ka jong u.
“Ka jingthmu jong kane ka jingpynlong ïa ka jingïalang ka long ban pyntip sha ki nongkyrshan ki jong nga ba ka jingdon ka jong ki hi, ka la kren shibun. Kumta ym donkam ban kylli shuh na ki. Ki la pyni ïa ka jinglong lakloi ka jong ki bad ka jingkmen,” u la ong.
Une u MLA ka Mawphlang u dei uba ar na ki 8 ngut ki MLA ba thmu pynïasoh sha ka BJP, uba la pynbna paidbah nalor u MLA ka Khliehriat Bah Kyrmen Shylla.
U Bah Beyondstar u la ong ba lada ka BJP ka pynurlong ïa ki jingkular kiba la ïakren, ym don jingartatien eiei ban pynïasoh noh bad kane ka seng.
“Ka jingthmu jong nga ban rung sha ka BJP ka long na ka bynta ka roi ka par jong ka konstitwensi namar ki kam pynroi ki dang duna bha hangne. Naduh u snem 2023 nga la ap ïa ka roi ka par ban poi ha kane ka konstitwensi hynrei mynta la ïaid palat lai snem, ngam ïohi jingkyrmen eiei,” u la ong.
Halor ka jingkynnoh ba ka BJP ka dei kaba pyrshah Khristan, u Bah Beyondstar u la kyntait ïa ki jingkynnoh kum ka jingpyrshang ban ïalam bakla ïa u paidbah.
“Kine baroh ki ïalam bakla ïa u paidbah. Ha Mawphlang konstitwensi ki don shibun ki niam bapher-bapher, ki don ki Seng Khasi, ki niam Khristan bapher-bapher. Ngam pat ju ïohsngew ba u nongbud Seng Khasi um shah ïa ki Khristan ban leit jingïaseng, lane ki Khristan ki peit beiñ ïa ka niam Khasi,” u la ong.
U la ong ba da ka jingdon hapoh ka seng kan pynkhlaiñ shuh-shuh ïa ka sur jong u ban ïada ïa ki jingmyntoi jong ka imlang sahlang.
“Kam don jingartatien ban rung sha ka BJP, kan nym ktah ïa ka niam. Ka jingdon jong ngi hapoh ka BJP kan ailad ïa ngi ban kren. Lada ka BJP ka pyrshang ban leh eiei pyrshah ïa ki Khristan, lada ngi don hapoh, ngi don ka bor ban kren pyrshah ïa kito kiba pyrshang ban leh bakla. Lada ngi don shabar, ngi lah ban rah tang ki lama ïong, ïaid rally ne shong jingïakhih,” u la ong.
Haba pynkynmaw biang ïa ka nongrim jong u, u MLA u la ong, “Ngi ïeng na ka bynta ka imlang sahlang, kam pher lada ngi rem ha ka ilekshon hynrei ka imlang sahlang kan im, kan ïai kynmaw ïa kaei kaba ngi la leh. Ngin ïai pyrshang ban leh kumba ka BJP ka la kular. Ki paidbah kin bishar ha u snem 2028. Kam pher lada nga rem ha ka ilekshon 2028, ka jaidbynriew kan im bad dei namarkata ba nga long skhem ban rung sha ka BJP.”
Phra ngut ki MLA ki don jingthmu ban leit ïasoh noh shen sha ka BJP hadien ka jingkular jong ki nongïalam ka BJP na Delhi ba kin pyntreikam ïa ki mat jingdawa ki MLA ba kynthup ïa ka jingpynbeit ïa ka FCRA ba kan ym ktah ïa ki Khristan, ka jingpyntreikam ïa ka MRSSA, jingpynrung ïa ka ktien Khasi ha ka Khyrnit ba Phra ka Riti Synshar ka Ri, ka kam tih dewiong, pynkynriah ïa kiba shong ha Them Metor bad kiwei-kiwei.
