Nongpoh, Nailur 17
Uwei u nongbylla sngi uba dang trei pynpra ïa ka slep jong ka karkhana Yummy kaba don ha 10 Mer ha Ri Bhoi District, u la duh noh ïa la ka jingim hadien ba u la hap najrong katei ka karkhana kumba ar phew phut eiei kaba la jia ha ka janmiet jong ka sngi Balang ha ka por kumba 6 baje eiei.
Katkum ka khubor ba la ïoh lum, la ïathuh ba utei u nongbylla sngi, u dei uba la tip kyrteng kum u Ratul Deka, 40 snem ka rta na ka shnong Kulmabari Morigaon jong ka jylla Assam. Ka jinghap ka jong une u nongtrei, la ïathuh ba ka dei namar ka jingkdiah kynsan jong ki ‘beam’ katei ka slep kat haduh ba u la ngat ha ka jingmynsaw jur.
Ki para nongbylla kiba la sakhi ïa katei ka jingjia, kila pynkit noh ïa u Ratul sha ARHI Hospital na ka bynta ban ïoh jingsumar, hynrei namar ka jingjur jong ka jingmynsaw ha ki bynta ka khlieh, u la khlad noh bad na ka liang ki pulit ka thanad Khanapara, kila pynkit noh ïa ka met ka sah sha Civil Hospital Nongpoh na ka bynta ban pyndep ïa ka post-mortem bad kiwei de ki jingdonkam katkum ka ain.
Kumban shu kdew hangne, ka karkhana Yummy ka dei kaba la long trai da u Ashish Deorah bad kala don ka jingmaramot ban pynbha ïa ka building mynta la kumba shi bnai eiei.
