Shillong, Nailur 17
Hapdeng ka jingjur jong ki kam kawang petrol bom ïa ki jaka treikam Sorkar, ki kali bad ki thanad ha nongbah Shillong, u Symbud Myntri Rangbah ba khmih ïa ka tnad Kam Pohïing (Police) Bah Prestone Tynsong ha ka sngi Palei u la maham ba ïa kum kine ki kam runar yn nym shah jem satia bad ban leh da kaba tyngeh.
Haba pyntip ba ka Sorkar kala pynkhlaiñ bha ïa ka bor pahara, u Bah Prestone u la ïathuh ba u la dep bthah ïa ka Director General of Police (DGP) ban shimkhia shuh shuh ïa ka kam bad hukum ban pyndait kham bun ki kor CCTV bad pynkhlaiñ ïa ka jingïaid pahara ha Sor. “Ïa kane la shimkhia da ki Pulit bad nga la dep bthah ïa ka DGP ba kan shimkhia shuh shuh ïa ka kam,” u la ong.
“Nga la dep bthah ïa ki ba ki hap ban pynkhlaiñ shuh shuh ïa ka jingpahara da kaba pyndait shuh shuh ïa ki kor CCTV ha ki jaka kiba donkam, ïa kane hap ban leh, bad ha kajuh ka por ki pulit kin pynkhlaiñ ruh ïa ka jingïaid pahara ha sor,” ong u Bah Prestone.
Haba kylli haduh lano yn dang ïohi ïa kum kine ki jingjia, u la ong, “Phim lah ban ong haduh lano, phi ïohi ba ki kam runar ki jia man ka minit”.
Haba ai jingkular ïa ki paidbah ba ka Sorkar kan leh tyngeh, u la ong, “Ngi kular ïa ki paidbah ba na ka liang ka Sorkar, kaei kaba lah ban leh ngin leh bad ngin ym shu sngap jem ïa kum kine ki kam runar kiba jia man ka sngi bad nga maham biang sa shisien, kito ki riew runar, ba kin sangeh ka leh kam pyntriem bad ka ain kan buddien ïa ki bad kin sa ïoh ïa ka jingbishar ba hok”.
Halor ka jingdonkam ïa ki bor pahara, u Bah Prestone u la ong ba ki pulit ka Jylla ki lah ban tehlakam ïa kane ka jinglong jingman. “Ka kynhun pulit jong ngi, kumba ka long mynta, ki la biang pura ban tehlakam ïa ka jinglong jingman,” u la ong.
