Shillong, Nailur 18
Arngut ki briew ki la shah kem bad shah set 14 sngi ha Judicial Custody halor ka jingkynnoh ba ki la tynrah da ka arshaka ïa u Additional SP Traffic u Lovish Garg ha ka por ba dang pynlong ka jingtalasi ïa ki kali bad arshaka ne ‘Naka’ ha ka por shiteng miet ha Urkaliar, ha kaba ki pulit ki la pynpaw ba ki sakhi sabut ki pyni ba ki dei ki dkhot jong ka Khasi Students’ Union (KSU).
U SP in-charge Traffic, ka East Khasi Hills, u Hari Prasath u la ïathuh ba ïa katei ka jingtalasi ïa ki kali bad arshaka ne ‘Naka’ la ïatreilang da ki pulit thanat, ki pulit pynïaid kali bad ki SOT hapdeng ka por 11 baje mynstep haduh ka por 2 baje mynstep.
“Ka don ka arshaka kaba u nongñiah bad uwei uba shong lang ki la pyrshang ban lait na ka jingtalasi ki pulit ha ka por kumba 1:30 baje mynstep. Haba u Additional SP (Traffic) u pyrshang ban pynsangeh ïa ki, ki la tynrah pynban ïa u bad ula mynsaw. Baroh arngut ki la shah kem bad ïa ka arshaka ruh la kurup noh” la ong u Prasath.
Shuh-shuh u la ïathuh ba ïa kitei ki arngut la pynngat ha ka jingthmu ban pynïap briew, ka jingbym kohnguh ïa ka hukum jong ki nongtrei paidbah bad ka jingpynmynsaw kaba jur ïa u nongtrei paidbah.
U la ïathuh ba u Garg, uba la mynsaw ha ki bynta jong ki kjat bad ka khlieh, u la don hapdeng ka jingshah sumar hapoh hospital.
U Prasath u la ong ba ka jingpeit bniah jong ki doktor, la lap ba kitei ki arngut kiba shong ha ka arshaka ki la buaid. “Ha ka por ba eksamin la lap ba ki la buaid, kumta kata ka lah ban dei kawei na ki daw, hynrei ka jingtohkit ba kham bniah ka dang ïaid shakhmat.”
Haba kylli hato kitei ki arngut ki dei kumba la suba ba ki dei ki dkhot jong ka KSU, u la ong, “Ka jingtohkit ka dang ïaid bad ïa kaei kaba la lap bad kaba la kren ha ka kyrwoh khubor.”
Haba pynshai ïa ki jingkyntait kiba mih na ki bahaïing kitei ki arngut, u Prasath u la pynskhem, “Ngi don ki sakhi sabut. Ka jingkren jong ngi ka long katkum ki sakhi sabut bad da kaba pynshong nongrim ha ki kyndon ba la pynngat ïa ki” u la ong.
