Shillong, Nailur 18
Katba ki pulit ki dang pynlong ka jingtalasi kali bad arshaka hynnin ka miet, u Additional Superintendent of Police Traffic u Lovish Garg u la mynsaw jur hadien ba kawei ka Scooty kaba shong da arngut ki briew ka la tynrah ïa u bad phet krad na ka jingtalasi kali ki pulit ha Urkaliar.
La ong ba katei ka jingtalasi kali ka dei kaba la pynlong hajan ka Samkhamti Petrol Pump ha ka por 1:30 mynstep ha kaba kitei ki arngut kiba shong ha katei ka Scooty kim shym la sngap ïa ka jingpynsangeh lane aidak ki pulit bad ki la ïaid sted beit shakhmat.
U SP City ka EKH u Bah Dangsan Khyriem MPS lyngba ka kyrwoh u la ong “Kawei ka Scooty kaba la shong da arngut ki shynrang ka la pyrshang ban phet na ka jingtalasi kali ki pulit bad ka la ïaid khlem sngap, wat haba la bthah ban sangeh.”
U la ong ba u Garg u la pynsangeh ïa katei ka Scooty, hynrei ka la tynrah pynban ïa u bad phet krad na katei ka jaka. “Ban ïada ba kin ym ïoh phet krad, u Lovish Garg, IPS, Additional Superintendent of Police, Traffic, East Khasi Hills, u la tuklar da kaba bthah ïa u nongñiah ban sangeh. Hynrei ha ka jaka ban sangeh, ka Scooty ka la pynher kynsan bad tynrah ïa u bad u la mynsaw jur ha katei ka jingjia” la ong u SP City.
U Bah Khyriem u la ong, “Ka rukom leh ka kdew ba ka dei ka jingleh khnang bad paw ba ki don jingthmu ban leh sniew ban pynmynsaw ïa u ophisar bad ban lait na ka jingshah khmih bniah”
Ïa une u ophisar pulit ba la mynsaw la pynkit noh mardor sha Woodland Hospital bad mynta u don ha HD Unit. Ki pulit ki la thep mukotduma ïa kane ka jingjia kum ka jingthmu ban shim ïa ka jingim bad la suba jur ruh ba kine ki arngut ki dei ki dkhot jong ka Khasi Students’ Union (KSU)
“Ka jingthmu jong ki ban ïaid ha ka por shiteng synñia bad ban kiar na ka jingshah khmih bniah ka dei kaba yn hap ban tohkit bniah” ong u Bah Khyriem.
U Bah Khyriem u la bynrap, ba ki jingkhmih bniah kiba jur kin ïai bteng na ka bynta ka jingshngaiñ jong ki paidbah bad ban pynneh ïa ka shongsuk shongsaiñ bad la khmih lynti ba ki briew kin bud ïa ki jingbthah kiba la pynmih da ki pulit ha ka por ba pynlong ïa ka jingkhynra, “Kano-kano ka jingpyrshang ban kiar khnang na ka jingkhmih bniah ki pulit ne ban ïaleh pyrshah ïa ki pulit kiba don ha ka kam, yn leh da kaba tyngeh katkum ki kyndon aiñ.
