Pdiang ki bym ïohi ki khmat ban nym pynheh ïa ki jingtem haba rwai ha Khyndailad

Shillong, Nailur 18

Ki nongrwai kiba dei ki bym ïohi ki khmat kiba ju rwai ha Khyndailad ki la pdiang ban nym pynheh ïa ki jingtem haba ki rwai khnang ban nym pynwit ïa ka ïaid ka ïeng jong ki paidbah bad ïa kiba shong dukan.

Katba kiwei pat ki la pynpaw ba lada ka Sorkar kam shah shuh ban rwai da ki jingtem kan ktah ïa ki namar ki ju kamai jakpoh da kaba ïoh ka jingïarap na ki paidbah kiba ïaid ba ïeng ha kane ka jaka.

Shuh shuh kiwei pat ki nongrwai ki la kyrshan ïa kane ka rai jong ka bor District ba kin nym tem shuh da ki jingtem kiba heh kaba pyndonkam da ki speaker hynrei kin tem da ka guitar khnang ban nym ktah ïa kiwei kiba shong dukan marjan.

Kum ban shu pynkynmaw ha kine ki sngi ka bor District ka East Khasi Hills ka la khang ban pyndonkam ïa ki jingtem kiba khlaiñ kum ki ‘speaker’, ki ‘amplifier’, ki ‘bluetooth speaker’ bad ki tiar pynmih sur da ki nongrwai rud surok bad ki nongrwai surok ha ki jaka ïew khaïi khlem da ïoh jingbit shwa.

Ha ka hukum ba la pynmih katkum ka Rules 5, 7 bad 8 jong ka Noise Pollution (Regulation and Control) Rules, 2000, u District Magistrate u Abhilash Baranwal u la ong ba la wanrah sha ka jingpyntip ba bun ki nongrwai ki pyndonkam ïa ki tiar pynsawa kiba palat ïa ka jingsawa ba la shah, da kaba pynkheiñ ïa ka hukum jong ka National Green Pollution Rules bad Noise.

Ka hukum ka ong ba ban pyndonkam ïa ki tiar pynmih sur, ki ‘amplifier’ bad ki ‘loudspeaker’ ha ki jaka paidbah donkam ban ïoh jingbit shwa da ka jingthoh na ka bor ba dei peit bad ym bit ban pyndonkam ïa kum kine ki tiar ha ka por miet hapdeng ka por 10 baje mynmiet haduh 6 baje mynstep .

Ïa ka jingbym kohnguh yn sa peit bniah bha bad yn shimkhia ïa kiba pynkheiñ katkum ka kyndon 223 BNS, nalor ka jingpynshitom da ka Meghalaya State Pollution Control Board katkum ka kyndon 15 jong ka Environment (Protection) Act, 1986.

Haba ïakren bad kine ki nongrwai kiba don ha Khyndailad ki don kiba pdiang ban nym pyndonkam shuh da ki jingtem kiba khlaiñ namar ka pynthut ïa ki briew namar don kiba pyrshang ban tem da ka guitar tangba ka la jah noh namar don kiwei pat kiba tem da ka speaker kaba khlaiñ kumta ki hap ban bud lang.

Katba kiwei pat ki nongrwai ki la ong ba lada ka Sorkar kam shah shuh ban tem da ki jingtem kan ktah ïa ki namar ki la ju im ban kamai jakpoh da kaba rwai ha Khyndailad.

Ki la ai jingmut ïa ka Sorkar ba lada kam shah shuh dei ban thaw da kiwei ki lad ïa ki khnang ban im kamai jakpoh.

Ha ka juh ka por ki kular ban tem da ki jingtem kiba kham rit ban nym pynwit ïa ki paidbah kiba ïaid ba ïeng bad ba shong dukan.