Shillong, Nailur 18
Ka Khasi Students’ Union (KSU) ka pynpaw ïa ka jingpyrshah kaba jur bad ka jingbym hun halor ka jingleh jong ki pulit ban rah ïa u Bah Kwilness Suchiang, General Secretary ka KSU East Jaiñtia Hills District Unit, na la ïing ha ka por shiteng sngi bad rah ïa u sha Sardar Police Station ban tohkit halor ka jingdon bynta jong u ha ka Black Flag Bike Rally, kaba la long ha ka 19 tarik u Nailar 2026.
Ka KSU ka kham sngewkhia halor ka rukom treikam jong ki pulit kaba paw kumba ka pyrshang ban pynïasoh ïa u Kwilness Suchiang bad ki kam pynjulor kiba la jia ha ka 19 tarik u Nailar, tang namar ba u la don bynta ha ka jingduwai bad jingkyrpad hakhmat U Blei, shuwa ban sdang ka Black Flag Bike Rally.
Ka KSU ka pynshai kdar, ba ka jingduwai shuwa ban sdang ïa ka prokram paidbah, nym lah ban shim ba don kti ha ki kam pynjulor bad hato ban duwai ruh ka long beaiñ seh? bad ka jingdon bynta ha ka jingduwai hi kam lah ban long ka sakhi kaba pyni ba u briew u don bynta ha kano-kano ka kam pynjulor.
Lada ki pulit ki don ki sakhi kiba biang pyrshah ïa kino kino ki briew kiba donkti ha ki kam pynjulor, ka kam jong ki pulit ka long ban tohkit hok, pynshong nongrim ha ki sakhi, wad ïa ki briew kiba don bynta shisha, lum ïa ki sabut bad leh ïa kaba donkam katkum ka aiñ, la ong ka KSU.
Ka la ong ruh ba ka jingïai bteng ban kynnoh bad khot hajir ïa ki dkhot lane ki nongkitkam ka KSU tang namar ka jingdon bynta jong ki ha ka seng, bad ban pynïasoh ïa ki bad kano-kano ka jingjia khlem da pyni ïa ka jingdon bynta jong ki, kam lah ban long ka rukom tohkit kaba dei.
Ka KSU ka kwah ban kylli: hato ka tnad pulit ka dang pynleit jingmut shisha ban wad ïa ki briew kiba donkti ha ki kam pynjulor, lane ka shu shim ïa ka lynti kaba suk da kaba pynshitom ïa ki dkhot ka KSU tang namar ba ki la don bynta ha ka jingïakhih paidbah?.
“Ka bor ban khot, tohkit, bat ne kem ïa u briew, ka wan ryngkat bad ka jingkitkhlieh ban pyndonkam ïa kata ka bor katkum ka aiñ, ki sabut bad ka nongrim jong ka jingtohkit kaba hok. Ka jingdon jong u briew ha ka rally, ka kyrdan jong u hapoh ka seng, lane ka jingdon bynta jong u ha ka jingduwai shuwa ban sdang ka prokram, kam mut ba u dei u nongkitkhlieh ïa kino-kino ki jingjia kiba la jia hadien kata,” la bynrap ka KSU.
Kumta ka KSU ka dawa ba ki pulit kidei ban jubab shai halor kane ka jingkylli, ba shano ka jingtohkit shaphang ki briew shisha kiba la donkti ha ki kam pynjulor ha ka 19 tarik u Nailur.
Ka kamram jong ki pulit ka long ban wad ïa ki nongleh kam bymman bad pynlong ïa ki ban ïeng hakhmat ka aiñ, ym ban shna ïa ki nongshah kynnoh tang na ka jingïasoh jong ki bad ka seng.
Lada ki pulit ki don ki sabut pyrshah ïa u GS EJH, to pyni ïa ki sabut bad ai ba ka aiñ kan leh ïa kaba donkam. Hynrei lada ym don satia ki sabut kiba pyni ïa ka jingdon bynta jong u ha ki kam pynjulor, ki pulit kidei ban batai paidbah, balei ba la leit shim ïa u na la ïing bad rah ïa u sha thanad ban tohkit.
Ka KSU ka burom ïa ka aiñ bad ka Rule of Law. Hynrei ka burom ïa ka aiñ kam mut ba kin shu pdiang jar-jar ïa kano-kano ka jingleh kaba long pyrshah ïa ka nongrim jong ka jingbishar hok.
Ka KSU kan ym sngap jar haba ka bor Sorkar, khamtam ka bor pulit, ka pyndonkam ban pyntieng lane ban khanglad ïa ka sur u paidbah. Ka KSU kan dang ïeng skhem ban ïada ïa ka Rule of Law, ka hok bad ka jingbishar hok, bad kan ym ailad ïa kano-kano ka jingpyndonkam bakla ïa ka bor Sorkar ban pynskuiñ ïa ka sur jong ka jaidbynriew.
