Jowai, Nailur 20
Ha kine ki khyndiat taiew kala don ka jingkhih phaloh saiñ pyrthei ha ka Jylla, khamtam hapoh ka United Democratic Party (UDP), ha kaba la don ruh ka jingpynsngewthuh bakla ïa ki paidbah ba ka UDP kan ïasoh bad ka Bharatiya Janata Party (BJP), la pynpaw u President ka UDP Bah Metbah Lyngdoh.
Ïa kane u Bah Metbah u la pynpaw ha ka jingïalang pan jingkyrshan ïa u kyrtong ka UDP u Bah Vivan G Kynta na ka bynta ka ilekshon shiteng samoi (by-election) ka Shillong Lok Sabha Parliamentary seat kaba long ha Tpep Pale, Jowai ha ka 19 tarik Nailur.
U la ong, ka UDP ka dei la ka jong ka party bad kan nym leit ïasoh bad kano kano ka party. Ka lah ban synrop lang bad kano kano ka seng saiñpyrthei ha kano kano ka por halor ki nongrim jong ka.
Kam shym la don ka jingrai ne jingïakren jong ki nongïalam jong ka party ban leit ïasoh bad kiwei pat ki seng saiñpyrthei, la ong u Bah Metbah, bad bynrap ba lada ïa kata ka rai ka mih na kino kino ki nongmihkhmat kiba leit ban ïasoh ka dei ka rai jong ki shimet shimet, ym na ka party.
Haba pan jingkyrshan ïa u kyrtong ka UDP, u Bah Metbah u la ong, “Ngi long kiba donbok ban ïoh ïa u Senior Advocate’, da kaba u kyntu ïa ki paidbah ban ai ka jingkyrshan kaba radbah khnang ba ynda u la jop, un ïoh ban ïasaid ïatai haba ïadei bad ki ain ki kyndon kiba ka Sorkar India ka pyrshang ban weng ïa ka jinglong kyrpang kum ka jaidbynriew hapoh ka jylla Meghalaya.
