Shillong, Nailur 20
U ophisar IPS barim ka Jylla bad nongaiktien ba rangbah ka BJP-Meghalaya, u Bah Mariahom Kharkrang, u la pynpaw ba ka la don ka ‘Facebook Account’ kaba la shna thok ha ka kyrteng jong u – kaba dei ruh ka sien kaba saw – bad ong ba la ujor ejahar haba ïadei bad kane ka bynta.
Ha ka jingkyrpad paidbah ba la pynmih ha ka Sngi U Blei, u Bah Kharkrang u la ong ba lyngba katei ka ‘Account’ thok la pyndonkam ban lum ïa ki nombor ‘WhatsApp’, ban kyrpad pan pisa bad kiwei-kiwei.
Haba pynmih ïa ka jingpynshai, u Bah Kharkrang u la ong, “Ngam ju pan ïa u nombor ‘WhatsApp’ jongno-jongno ruh lyngba ka ‘Facebook’. Lada phi pyrkhat bha, ka dei ka jingleh ka bym don nongrim.”
U la bynrap, “Nga dei u ophisar IPS barim bad ngam donkam ban pyndonkam ïa ka ‘Facebook Account’ shimet jong nga na ka bynta kino-kino ki kam.”
“Ngam ju, nga pynkynmaw biang ba ngam ju, pan na ki briew na ka bynta kano-kano ka jingïarap pisa,” u la ong.
Da kaba kyrpad ïa ki paidbah ba kim dei ban ngop ha kum kine ki jingkyrpad, u Bah Kharkrang u la bynrap, “Sngewbha pyntip sha ka thanad kaba jan tam haba ïadei bad kano-kano ka jingkyrpad kaba kum kane na ka ‘Facebook Account’ jong nga bad pdiang ïa kane kum ka jingkyrpad shimet jong nga.”
U la ong, “Nga la dep ujor ejahar sha ki pulit bad ka jinglong husiar jong phi kan ïarap shibun eh ïa nga ban jop ïa kane ka jingeh kaba la pynlong da ki katto-katne ki nongleh kam sniew.”
